Oǵan qatysty sotqa deıingi tergeý sharalary «Ádildik joly» RQB Almaty qalalyq fılıalynyń ótinishi boıynsha bastalǵan edi.
Onyń kinási – Almatyda «Artsport» memlekettik baǵdarlamasyna bólingen aqshany jymqyrǵany. Jergilikti kásipkerlik basqarmasy óz esebinen qarjylandyryp, atalǵan baǵdarlama arqyly balalar men jasóspirimderdiń sport seksıalaryna tegin qatysýyna múmkindik berý kózdelgen edi. Al Ánýarbek Chakıev balalar týraly jalǵan málimet engizip, 24 963 011 teńgeni qaltaǵa basqan bolyp shyqty.
Bul jymysqy oıyn iske asyrý úshin Ánýarbek Chakıev 2021 jyldyń qazanynda sol mektepterdiń basshylarymen múlikti 3 jylǵa qaıtarymsyz jalǵa alý kelisimshartyn jasasady. Múlik degenińiz sport ǵımarattary. Bul jerde mektep dırektorlary da óz qyzmetin asyra paıdalanǵan. Óıtkeni, memleket múlkin basqarý men ony jaratý olardyń quzyryna kirmeıdi. Onymen qalalyq memlekettik aktıvter basqarmasy aınalysýy kerek.
Al Chakıev sol oıyn iske asyrýdy oılap, sol mektepterdegi muǵalimderdi de qaramaǵyna tartyp, árqaısyna aıyna 100 myń teńgeden tólep otyratyn bolady. Onysyn resmı túrde eńbek kelisimsharymen rásimdemegen.
Odan bólek, mektep dırektorlary men muǵalimder ata-analarǵa eskertpeı Chakıevke oqýshylardyń JSN men basqa da jeke málimetterin berip otyrǵan. Al ol ony balalar úıirmeler men seksıalarǵa baryp júr degen jalǵan esepke paıdalanǵan. Negizi bul naǵyz jeke derekter týraly zańdy óreskel buzý. Saıyp kelgende, mektep basshylary men muǵalimder osyndaı aýyr qylmys jasaýǵa qolǵabys etken.
