Onyń sózine qaraǵanda, ótken aptanyń sońynda Aron Atabektiń jaǵdaiy nasharlaǵan. Budan soń jedel járdem shaqyrtylyp, jeke klinikaǵa jatqyzylǵan.
– Qazir jaǵdaiy onsha emes. Tamaq ishe almaidy. Aýrýy asqynyp jatyr. Álginde aýrýhanadan shyqqannan keiin on kúndei úide emdedik qoi. Ol kisi aýrýhanaǵa jatýdan bas tartqan. Úide emdelgennen keiin jaǵdaiy tipti nasharlap ketti. Ol ádette eshteńege shaǵymdanbaityn. Ótken jumada tynysy tarylyp jatqanyn aitty. Qorqyp kettim. Túri de onsha emes bolyp turdy. «Jeke klinikamen kelisim jasastym, aýrýhanaǵa jatasyń ba» dep edim. Aýrýy janyna batsa kerek, «iá» dedi. Súitip, jedel járdem kóligin shaqyrdym. Aýrýhanaǵa jatqyzdy, – dedi Ráziia Nutysheva Azattyq tilshisine.
Onyń sózine qaraǵanda, Aron Atabek qazir jasandy tynys apparatymen dem alyp jatyr. Aýrýhanaǵa kelgennen keiin «jaǵdaiy sál de bolsa ońalǵan». Sonda «esin jiyp, óz-ózine kelgennen keiin qaita úige barǵysy kelip otyr» deidi. Ádette reanimatsiia bólimine dárigerler eshkimdi kirgizbeidi. Sol sebepti qaryndasy baýyrynyń jaǵdaiyn dárigerler arqyly bilip otyrǵanyn aitty.
Dissidenttiń qaryndasy Aron Atabektiń naqty qai aýrýhanada jatqanyn aitpady.
