Arys qalasyna qarasty Montaıtas aýyldyq okrýginiń Shaǵyr eldi mekeninde 2,5 myń sharshy metr aýmaqty quraıtyn sport jáne balalar alańshasy paıdalanýǵa berildi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Bir myńǵa jýyq turǵyny bar eldi mekende ótken sharaǵa Arys ákimi Gúljan Qurmanbekova men aýyl turǵyndary qatysty.

Shaǵyrlyq jeke kásipker Qadyrǵalı Satymbekovtiń demeýshiligimen iske asyrylǵan joba aıasynda budan bylaı qoǵam arasynda salaýatty ómir saltyn ustanatyn azamattar men sportty janyna serik etetin turǵyndar qatary kóbeıe túsetin boldy.

Jıynda sóz sóılegen Arys ákimi ult saýlyǵyn nyǵaıtýǵa baǵyttalǵan ıgi sharalarǵa qoldaý kórsetken kásipkerlerge alǵysyn aıtty.

Jalpy quny 32 mıllıon teńgeni quraıtyn nysanda myń sharshy metrden asatyn kishi fýtbol alańshasy bar. 1 myń sharshy metrge jaıaý júrginshiler jolaǵy salynyp, talapqa saı jaryqtandyrylǵan. Sonymen qatar, sport alańshasynyń mańynda shaǵyn demalys aımaǵy salynǵan.

Aıta keteıik, Arys qalasy men aýyldyq okrýgterde 86 vorkaýt pen oıyn jáne sport alańshasy paıdalanýǵa berilgen. Bul – 87-shi nysan. 78 nysan búdjet esebinen, 7-i demeýshiler esebinen júzege asyryldy.