Osy jyldyń maýsymynda shyqqan úkimge burynǵy mádenıet jáne sport mınıstrimen birge sottalǵan Almaz Nurazhan, Aıym Sádýaqasova, Azamat Kóshenov te kelispeıdi. Shaǵymdy qalalyq sottyń apelásıalyq kollegıasynda sýdıalar Soltybaeva, Esimova, Ámirǵalıeva qarady.
Advokat Ámirenova óziniń qorǵaýyndaǵy Almas Nurazhan qazirgi ýaqytta basqa is boıynsha sottan ótip jatqanyn aıtty. Onyń sózinshe, atalǵan iste aıyptalýshy óteýge mindettelgen somany tólep jatyr. Onyń bul ótinishin Aıym Sádýaqasovanyń advokaty Nurbaeva da qoldady.
Sottalǵan Kóshenovtyń advokaty Temirbolatov buryn shyqqan úkimge baılanysty qaıtadan ekonomıkalyq saraptama júrgizip, sot tergeýin qaıta júrgizýdi talap etti.
Arystanbek Muhamedıulynyń áıeli Ǵalıa Ysqaqova apelásıa sotynda kúıeýiniń qoǵamdyq qorǵaýshysy retinde sotqa ótinish bildirgenin atap ótti. Ol buryn alǵashqy sot sheshimi shyqpaı turyp 111 mln teńgeni ne úshin bergenin túsindirýge tyrysty.
“2022 jyldyń qarasha aıynyń basynda bizge saraptama tapsyryldy. Ol kezde jalpy shyǵynnyń kólemi 111 mln teńge dep eseptelgen. Advokattar aıyptaý tarapymen kelissózderdi júrgizdi. Ol kezde bizge qalalyq antıkor ókilderi “sol shyǵyndy óteseńder kúıeýińizge taǵylǵan aıyptyń kvalıfıkasıasy ózgeredi” dep aıtty. 7-8 qarashada eki transhpen osy somany ótedim. Maǵan sol kezde advokat aqshany bergen kezde “Altyn adam sherýi kórmesi boıynsha Arystanbek Muhamedıulynyń shyǵyndy óteýi” dep jaz dedi. Men solaı istedim. Aqyry, basqa saraptama shyqty da, múlde basqa soma kórsetildi. Meniń kúıeýime taǵylǵan bap boıynsha kvalıfıasıa ózgertilgen joq. Bizge “kúıeýińiz aıybyn moıyndady” deıdi. Biraq bizdi adastyrdy. Kúıeýim osy arqyly kinásin moıyndaıtynyn bildirgisi kelmegen”, – deıdi Ǵalıa Ysqaqova.
Eks-mınıstrdiń áıeli “111 mln teńge qate tólenip ketti” dep, búkil ınstansıaǵa jazǵanyn aıtady. Artynsha quqyq qorǵaý organdary Ysqaqovaǵa tek aqshany sot sheshimi shyqqannan soń ǵana tóleýi tıis bolǵanyn aıtqan.
“Alaıda bizge bul týraly eshkim eshteńe túsindirmedi. Men de, kúıeýim de zańger emespiz. Ol kezde bizdiń advokatymyz – Nesipbaev, Shaıhına, Japparova edi. Olar kelissóz júrgizdi. Biz solardyń zańgerlik biliktiliginen úmittendik. Sol somany tóledik. Búkil týystarymnan aqsha aldym. Sotqa men qatysqan kezde bul jaıtty sýdıa Ydyrysovqa aıttym, bárin túsindirip, sýdıadan osy aqshany maǵan qaıtarýdy suradym. Sebebi biz kináni moıyndamaımyz. Úkim shyqqan kezde sýdıa men kúıeýim úshin tólegen sol aqshany osy is boıynsha keltirilgen jalpy shyǵynǵa qosa saldy. 156 mln teńge – jalpy shyǵyn dep tanyǵan sýdıa qalǵan 46 mln teńgeni sottalýshylar teń bólip tóleýi kerek dep sheshim shyǵardy. Ne sebepti? Men advokattyń ótinishimen kelisemin. Osy máselege nazar aýdarýdy ótinemin”, – dedi Ǵalıa Ysqaqova.
Arystanbek Muhamedıulynyń advokaty Áıgerim Ánýarbek bul ótinishti qoldaıtynyn, ne sebepti búkil shyǵyndy ol óteýi kerektigin aıtty. Sot barysynda basqa advokattar istiń keıin qaralýyna qarsylyq bildirdi.
Eske salaıyq, eks-mınıstr Arystanbek Muhamedıuly QR Qylmystyq kodekstiń 28-baby 3-bóligi jáne 189-bóligi 4-tarmaǵy 2-tarmaǵy boıynsha quqyq buzýshylyq jasaǵany úshin kináli dep tanylyp, 8 jylǵa bas bostandyǵynan aıyryldy. Al shilde aıynda Sybaılas jemqorlyqqa qarsy is-qımyl agenttigi eks-mınıstrdiń áıeli Ǵalıa Ysqaqova kúdikti dep tanylǵanyn málim etken.
