وسى جىلدىڭ ماۋسىمىندا شىققان ۇكىمگە بۇرىنعى مادەنيەت جانە سپورت مينيسترىمەن بىرگە سوتتالعان الماز نۇرازحان، ايىم ءسادۋاقاسوۆا، ازامات كوشەنوۆ تە كەلىسپەيدى. شاعىمدى قالالىق سوتتىڭ اپەللياسيالىق كوللەگياسىندا سۋديالار سولتىبايەۆا، ەسىموۆا، امىرعالييەۆا قارادى.
ادۆوكات امىرەنوۆا ءوزىنىڭ قورعاۋىنداعى الماس نۇرازحان قازىرگى ۋاقىتتا باسقا ءىس بويىنشا سوتتان ءوتىپ جاتقانىن ايتتى. ونىڭ سوزىنشە، اتالعان ىستە ايىپتالۋشى وتەۋگە مىندەتتەلگەن سومانى تولەپ جاتىر. ونىڭ بۇل ءوتىنىشىن ايىم ءسادۋاقاسوۆانىڭ ادۆوكاتى نۇربايەۆا دا قولدادى.
سوتتالعان كوشەنوۆتىڭ ادۆوكاتى تەمىربولاتوۆ بۇرىن شىققان ۇكىمگە بايلانىستى قايتادان ەكونوميكالىق ساراپتاما جۇرگىزىپ، سوت تەرگەۋىن قايتا جۇرگىزۋدى تالاپ ەتتى.
ارىستانبەك مۇحامەدي ۇلىنىڭ ايەلى عاليا ىسقاقوۆا اپەللياسيا سوتىندا كۇيەۋىنىڭ قوعامدىق قورعاۋشىسى رەتىندە سوتقا ءوتىنىش بىلدىرگەنىن اتاپ ءوتتى. ول بۇرىن العاشقى سوت شەشىمى شىقپاي تۇرىپ 111 ملن تەڭگەنى نە ءۇشىن بەرگەنىن تۇسىندىرۋگە تىرىستى.
“2022 جىلدىڭ قاراشا ايىنىڭ باسىندا بىزگە ساراپتاما تاپسىرىلدى. ول كەزدە جالپى شىعىننىڭ كولەمى 111 ملن تەڭگە دەپ ەسەپتەلگەن. ادۆوكاتتار ايىپتاۋ تاراپىمەن كەلىسسوزدەردى جۇرگىزدى. ول كەزدە بىزگە قالالىق انتيكور وكىلدەرى “سول شىعىندى وتەسەڭدەر كۇيەۋىڭىزگە تاعىلعان ايىپتىڭ كۆاليفيكاسياسى وزگەرەدى” دەپ ايتتى. 7-8 قاراشادا ەكى ترانشپەن وسى سومانى وتەدىم. ماعان سول كەزدە ادۆوكات اقشانى بەرگەن كەزدە “التىن ادام شەرۋى كورمەسى بويىنشا ارىستانبەك مۇحامەدي ۇلىنىڭ شىعىندى وتەۋى” دەپ جاز دەدى. مەن سولاي ىستەدىم. اقىرى، باسقا ساراپتاما شىقتى دا، مۇلدە باسقا سوما كورسەتىلدى. مەنىڭ كۇيەۋىمە تاعىلعان باپ بويىنشا كۆاليفياسيا وزگەرتىلگەن جوق. بىزگە “كۇيەۋىڭىز ايىبىن مويىندادى” دەيدى. ءبىراق ءبىزدى اداستىردى. كۇيەۋىم وسى ارقىلى كىناسىن مويىندايتىنىن بىلدىرگىسى كەلمەگەن”، – دەيدى عاليا ىسقاقوۆا.
ەكس-مينيستردىڭ ايەلى “111 ملن تەڭگە قاتە تولەنىپ كەتتى” دەپ، بۇكىل ينستانسياعا جازعانىن ايتادى. ارتىنشا قۇقىق قورعاۋ ورگاندارى ىسقاقوۆاعا تەك اقشانى سوت شەشىمى شىققاننان سوڭ عانا تولەۋى ءتيىس بولعانىن ايتقان.
“الايدا بىزگە بۇل تۋرالى ەشكىم ەشتەڭە تۇسىندىرمەدى. مەن دە، كۇيەۋىم دە زاڭگەر ەمەسپىز. ول كەزدە ءبىزدىڭ ادۆوكاتىمىز – نەسىپبايەۆ، شايحينا، جاپپاروۆا ەدى. ولار كەلىسسوز جۇرگىزدى. ءبىز سولاردىڭ زاڭگەرلىك بىلىكتىلىگىنەن ۇمىتتەندىك. سول سومانى تولەدىك. بۇكىل تۋىستارىمنان اقشا الدىم. سوتقا مەن قاتىسقان كەزدە بۇل جايتتى سۋديا ىدىرىسوۆقا ايتتىم، ءبارىن ءتۇسىندىرىپ، سۋديادان وسى اقشانى ماعان قايتارۋدى سۇرادىم. سەبەبى ءبىز كىنانى مويىندامايمىز. ۇكىم شىققان كەزدە سۋديا مەن كۇيەۋىم ءۇشىن تولەگەن سول اقشانى وسى ءىس بويىنشا كەلتىرىلگەن جالپى شىعىنعا قوسا سالدى. 156 ملن تەڭگە – جالپى شىعىن دەپ تانىعان سۋديا قالعان 46 ملن تەڭگەنى سوتتالۋشىلار تەڭ ءبولىپ تولەۋى كەرەك دەپ شەشىم شىعاردى. نە سەبەپتى؟ مەن ادۆوكاتتىڭ وتىنىشىمەن كەلىسەمىن. وسى ماسەلەگە نازار اۋدارۋدى وتىنەمىن”، – دەدى عاليا ىسقاقوۆا.
ارىستانبەك مۇحامەدي ۇلىنىڭ ادۆوكاتى ايگەرىم انۋاربەك بۇل ءوتىنىشتى قولدايتىنىن، نە سەبەپتى بۇكىل شىعىندى ول وتەۋى كەرەكتىگىن ايتتى. سوت بارىسىندا باسقا ادۆوكاتتار ءىستىڭ كەيىن قارالۋىنا قارسىلىق ءبىلدىردى.
ەسكە سالايىق، ەكس-مينيستر ارىستانبەك مۇحامەدي ۇلى ق ر قىلمىستىق كودەكستىڭ 28-بابى 3-بولىگى جانە 189-بولىگى 4-تارماعى 2-تارماعى بويىنشا قۇقىق بۇزۋشىلىق جاساعانى ءۇشىن كىنالى دەپ تانىلىپ، 8 جىلعا باس بوستاندىعىنان ايىرىلدى. ال شىلدە ايىندا سىبايلاس جەمقورلىققا قارسى ءىس-قيمىل اگەنتتىگى ەكس-مينيستردىڭ ايەلى عاليا ىسقاقوۆا كۇدىكتى دەپ تانىلعانىن ءمالىم ەتكەن.
