Arysta toihanalar sport ortalyqtaryna ainalyp jatyr
Jaqyn kúnderi Arys qalasynyń irgesinde ornalasqan Aqdala aýyldyq okrýginde burynǵy 500 oryndyq saltanat saraiy 1200 balany qabyldaýǵa qaýqarly sporttyq baǵyttaǵy ǵimarat bolyp aýysqaly jatyr.
Sanaýly kúnnen keiin iske qosylatyn sport ortalyǵynda boks, dziýdo, qazaq kúresi men bi úiirmesi jumys isteitin bolady. Jasóspirimderdiń tegin jattyǵatyn ortalyǵyna tájiribeli mamandar jan-jaqtan arnaiy shaqyrtylǵan.
Jastardyń shynyǵyp, shymyr bolýyna jaǵdai jasaǵan jas kásipker Álibek Quralbek «tabystan góri týǵan jerdi túletýge qumarttym» deidi.
Aita keteiik, Arysta buǵan deiin de bir toihana «Teń qoǵam» áleýmettik ortalyǵy bolyp beiimdelgen bolatyn. Munda múmkindigi shekteýli azamattar úshin bos ýaqytyn tiimdi úilestirýge jaǵdai jasalǵan.
Aptasyna bes kún jumys isteitin nysanda ústel tennisi, jattyǵý zaly men oi-óristi damytýǵa arnalǵan túrli jabdyqtar qoiylǵan. Tipti, tájiribeli mamannyń massajy men kitaphanasy da bar. Munda qyzmetke qabyldanǵan jumysshylar da múmkindigi shekteýli jandardan quralǵan.
Jalpy búginde Arys qalasynda ornalasqan 18 toihana bar bolsa, qazirgi kezde sonyń 5-eýi nysanaly maqsatyn aýystyryp, áleýmettik baǵytta el igiligine qyzmet etýde.
Bul igilikti iske uiytqy bolǵan kásipkerler memlekettik baǵdarlamanyń arqasynda qarjylandyrylady. Sondyqtan turǵyndar úshin barlyǵy tegin. Tek ǵimaratty óz aqshasyna suranysqa sai jabdyqtap, talapqa sai beiimdeýi kerek.
