– Abaıdyń óleńderi men qara sózinde ulttymyzdyń bolmys-bitimi men turmys-tirshiligi, dúnıetanymy, rýhanı álemi kórinis tapqan. Arys qalasynyń 65 jyldyq mereıtoıy elge oı salatyn, taǵlymy mol tanymdyq is-sharalarmen jalǵasyn taýyp jatyr. Álemge tanymal bas aqynymyzdyń eńbegin halyq bolyp ulyqtaý memleketimizdiń mereıin arttyrady. Uly oıshyldyń asyl murasyn ardaqtaý jáne jan-jaqty dáripteý – bárimizge ortaq mindet. Ol úshin búgingi býyn Abaı murasynan nár alyp, rýhanı kemeldenýi tıis. Qazaqstan Respýblıkasynyń Prezıdenti Qasym-Jomart Kemeluly: «Abaı qazaqtyń ár balasyn ultjandy azamat etip tárbıeleýge shaqyrdy. Onyń murasy – parasatty patrıotızmniń mektebi, eldikti qadirleýdiń negizi. Sondyqtan, azamattarymyzdyń kózi ashyq bolsyn desek, Abaıdy oqýdan, aqyn óleńin jattaýdan jalyqpaǵan jón» dep atap ótti. Olaı bolsa, ortalyq kitaphana aldynda boı kótergen eńseli eskertkish jastarymyzdy Abaı armandaǵan kemeldikke jeteleıdi dep senemin, – dedi oblys ákimi.
Búst uly aqynnyń esimin jas urpaqqa keńinen nasıhattaý maqsatynda, qalalyq ortalyqtandyrylǵan kitaphanalar júıesi mekemesiniń aldyna ornatyldy. Eskertkishtiń bıiktigi – 4 metr, tuǵyry – 2,20 metr, bústiniń bıiktigi – 1,50 metr. Tuǵyry granıt-mramordan jasalǵan. Eńseli eskertkishtiń aınalasyna kógaldandyrý jumystary júrgizilip, 7 jaryqsham, 7 oryndyq, 2 projektor qoıyldy.
Sonymen birge osy kúni Arys qalasynyń 65 jyldyq mereıtoıyna arnalǵan merekelik is-shara jáne konsert ótti. Saltanatty jıynda oblys ákimi Ómirzaq Shókeev «Bıyl Orta Azıanyń qaqpasy atanǵan Arys qalasyna 65 jyl tolyp otyr. El Táýelsizdiginiń 30 jyldyǵymen tuspa-tus kelgen bul mereıtoı arystyqtar ǵana emes, tutas temirjolshylar qaýymy úshin de zor mártebe. Árıne qalanyń tarıhy júzjyldyqtarǵa jeteleıdi. Búgingi tańda barsha qazaq halqy, onyń ishinde Túrkistan oblysynyń turǵyndary Tuńǵysh Prezıdentimiz Elbasy Nursultan Nazarbaevtyń sarabdal saıasatynyń nátıjesinde júzege asyp jatqan oń ózgeristerdiń kýási bolyp keledi. Arys óńirinde bul kúni san-salaly baǵyttar boıynsha jarqyn jobalar júzege asyrylyp jatyr», – deı kele arystyqtardy quttyqtady.
Arys qalasynyń merekesine oraı óńirden shyqqan óner juldyzdary ánnen shashý shashty. Atap aıtsaq, keshte Qazaqstan jáne Tatarstan Respýblıkalarynyń halyq ártisi Nurjamal Úsenbaeva, Qazaqstan Respýblıkasynyń eńbek sińirgen qaıratkeri Aqjol Meıirbekov, ánshi, sazger Nurlan Espanov, Janbolat pen Jazıra, Arystyń kúmis kómeı ánshileri men myń buralǵan bıshileri jáne ózge de estarada juldyzdary, sondaı-aq «Shanshar» ázil-syqaq teatry óner kórsettti.
Saltanatty jıynda birneshe azamatqa «Arys qalasynyń qurmetti azamaty» ataǵy berildi.
Jarylystan keıin memlekettiń, kúlli eldiń qoldaýymen jańarǵan Arys búginde damýdyń dańǵyl jolyna tústi. Bul – qoǵamnyń ortaq jeńisi.
