Soltústik Qazaqstan oblysy men Ordabasy aýdanyna bekitilgen qaladaǵy 13 – sektor jetekshileri saltanatty shara uıymdastyryp, Arysty qalpyna keltirý boıynsha júrgizilgen jumystarynda eleýli eńbek etken jumysshylar men belsendiler marapattaldy.
Saltanatty sharaǵa Soltústik Qazaqstan oblysynyń ákiminiń orynbasary Qaırat Mýstafın men Ordabasy aýdanynyń ákimi Álipbek Óserbaev qatysyp, turǵyndarmen kezdesti.
Ákimdik ókilderi turǵyndardy úılerine baryp quttyqtap, olarǵa turmystyq tehnıka syıǵa tartty.
Soltústik Qazaqstan oblysy men Ordabasy aýdanyna birlese otyryp 13-sektorǵa bekitilgen 17 kóshedegi 371 turǵyn úıdiń jaǵdaıyn zerdelep, zaqym kelgen 198 baspananyń jóndelýine kúsh saldy.
Sondaı-aq ataýly áleýmettik kómekke qujattar rásimdeý úshin de tıisti mamandar bólinip, jumys júrgizilgen. Bul aýmaq boıynsha bir jolǵy beriletin járdem aqy barlyq 18 jasqa tolǵan 954 turǵynǵa bank kartochkalary arqyly taratylyp berildi.
Arystaǵy tótenshe jaǵdaıdan soń qalany qalpyna keltirý boıynsha 17 sektorǵa bólinip qyzý qurylys jumystary júrgizildi. Búgingi tańda, jalpy 9 sektor ózderine qarasty aımaqtaǵy jumystardy aıaqtap, qala turǵyndaryna qýanysh syılady.
Túrkistan oblysy ákiminiń baspasóz qyzmeti
