Aral teńizine 200 mln tekshe metr sý jiberildi, - dep habarlaidy Dalanews.kz.
Qyzylorda oblysynyń sharýalary sý únemdeý tehnologiialaryn engizýdiń nátijesinde 200 mln tekshe metrge jýyq sý únemdedi. Bul sý Aral teńizine jiberildi. Aita keteiik, biyl óńirdiń diqandary 55 myń gektar kúrish alqabynda sý únemdeý tehnologiialaryn qoldandy. Al Qyzylorda oblysyndaǵy kúrish alqaptarynyń jalpy aýdany 84 myń gektar.
Osylaisha, 2024 jylǵy sýarý maýsymynda teńizge shamamen 1 mlrd tekshe metr sý jiberildi, bul ótken jylmen salystyrǵanda 3 ese kóp.
Jyl basynan beri Soltústik Aralǵa shamamen 2 mlrd tekshe metr sý jiberildi. Búgingi tańda teńizdegi sýdyń jalpy kólemi 22 milliard tekshe metrge jetti.
"Sý diplomatiiasy men Ortalyq Aziiadaǵy áriptesterimizben tyǵyz jumystan bólek, Aral teńizine sý jiberýge únemdi tehnologiialardy engizý de mańyzdy ról atqarady. Olardy qoldaný júzdegen mln tekshe metr sý únemdeýge jáne ony teńizge baǵyttaýǵa múmkindik beredi. Ol úshin biz sharýalardyń sý únemdeý tehnologiialaryn engizýge jumsaǵan shyǵyndaryn sýbsidiialaý kólemin 50%-dan 80%-ǵa deiin ulǵaittyq. Aldaǵy úsh jylda sý únemdeý tehnologiialarymen sýarmaly sýdy paidalanatyn sharýa qojalyqtary úshin sýbsidiia mólsheri 50%-dan 85%-ǵa deiin ulǵaiady", - dedi Sý resýrstary jáne irrigatsiia ministri Nurjan Nurjigitov.
Eske salaiyq, buǵan deiin Aralda balyq kóbeie bastaǵanyn jazǵan edik. Sońǵy 5 jylda alǵash ret Aralǵa sý jiberý jospary 100 paiyzǵa jýyq oryndalǵan.
