Kezdesý barysynda qonaqtar óńir basshysyna kompanıa týraly tolyq aqparat berip, iske asyrylǵaly otyrǵan ınvestısıalyq jobasyn tanystyrdy. 25 jyldyq tarıhy bar kompanıa túrli salalarda eńbek etedi. Negizinen bıznes jobalardy ázirlep, ınvestısıalyq iri qurylymdardy qurýǵa járdemdesedi. Kompanıanyń bas ǵımaraty Birikken Arab Ámirliginiń Ras-Al-Haıma qalasynda ornalasqan.
– Bizdiń maqsatymyz – Ońtústik Qazaqstan oblysynan turmystyq qatty zattardy qaıta óńdeýden ótkizetin zaýyt salý. Bul rette bizdiń kompanıa negizgi eki baǵytta jumys isteýdi kózdep otyr. Onyń alǵashqysy – turmystyq qaldyqtardy qaıta óńdeý bolsa, ekinshisi – jasyl ekonomıka salasyn damytý. Atalǵan eki joba da ekologıaǵa zıansyz ári eki jaqqa da óte tıimdi dep oılaımyz», - dedi Iorga Shnaıder myrza.
Sheteldik qonaqtardyń ınvestısıalyq jobasymen tanysqan oblys basshysy óńirdiń ekonomıkalyq áleýetin baıandap, ınvestorlarǵa memleket tarapynan kórsetiletin jeńildikterdi túsindirdi.
«Turmystyq qaldyqtardy óńdeý boıynsha oblysymyzǵa buǵan deıin de birneshe usynystar kelip túsken bolatyn. Alaıda olardyń birqatary qaǵaz júzinde iske aspaı qaldy. Oǵan birqatar sebepter bolǵany da jasyryn emes. Endigi másele – atalǵan zaýyttyń qurylysyn tezdetip bastap, iske asyrý óte mańyzdy. Bul rette jergilikti bılik arnaıy jumysshy tobyn quryp, atqarylatyn sharýalardyń kestesi túzilýi tıis», - dedi J. Túımebaev.
Búginde oblys halqynyń sany kún sanap artyp keledi. Iaǵnı tutynýshy bar jerde qoqystyń da arta túsetini zańdylyq. Osy máselege toqtalǵan óńir basshysy atalǵan zaýytty Túrkistan men Kentaý qalalary tóńireginnen nemese Saryaǵash, Maqtaral aýdandarynyń mańynan salýdy usyndy.
Qonaqtar oblys basshysynyń bul usynysyn qabyl alyp, atalǵan aýmaqtarǵa arnaıy baryp tanysyp qaıtýǵa nıetti ekendikterin jetkizdi.
OQO ákiminiń baspasóz qyzmeti
https://dalanews.kz/25325
