كەزدەسۋ بارىسىندا قوناقتار ءوڭىر باسشىسىنا كومپانيا تۋرالى تولىق اقپارات بەرىپ، ىسكە اسىرىلعالى وتىرعان ينۆەستيسيالىق جوباسىن تانىستىردى. 25 جىلدىق تاريحى بار كومپانيا ءتۇرلى سالالاردا ەڭبەك ەتەدى. نەگىزىنەن بيزنەس جوبالاردى ازىرلەپ، ينۆەستيسيالىق ءىرى قۇرىلىمداردى قۇرۋعا جاردەمدەسەدى. كومپانيانىڭ باس عيماراتى بىرىككەن اراب امىرلىگىنىڭ راس-ال-حايما قالاسىندا ورنالاسقان.
– ءبىزدىڭ ماقساتىمىز – وڭتۇستىك قازاقستان وبلىسىنان تۇرمىستىق قاتتى زاتتاردى قايتا وڭدەۋدەن وتكىزەتىن زاۋىت سالۋ. بۇل رەتتە ءبىزدىڭ كومپانيا نەگىزگى ەكى باعىتتا جۇمىس ىستەۋدى كوزدەپ وتىر. ونىڭ العاشقىسى – تۇرمىستىق قالدىقتاردى قايتا وڭدەۋ بولسا، ەكىنشىسى – جاسىل ەكونوميكا سالاسىن دامىتۋ. اتالعان ەكى جوبا دا ەكولوگياعا زيانسىز ءارى ەكى جاققا دا وتە ءتيىمدى دەپ ويلايمىز»، - دەدى يورگا شنايدەر مىرزا.
شەتەلدىك قوناقتاردىڭ ينۆەستيسيالىق جوباسىمەن تانىسقان وبلىس باسشىسى ءوڭىردىڭ ەكونوميكالىق الەۋەتىن بايانداپ، ينۆەستورلارعا مەملەكەت تاراپىنان كورسەتىلەتىن جەڭىلدىكتەردى ءتۇسىندىردى.
«تۇرمىستىق قالدىقتاردى وڭدەۋ بويىنشا وبلىسىمىزعا بۇعان دەيىن دە بىرنەشە ۇسىنىستار كەلىپ تۇسكەن بولاتىن. الايدا ولاردىڭ ءبىرقاتارى قاعاز جۇزىندە ىسكە اسپاي قالدى. وعان ءبىرقاتار سەبەپتەر بولعانى دا جاسىرىن ەمەس. ەندىگى ماسەلە – اتالعان زاۋىتتىڭ قۇرىلىسىن تەزدەتىپ باستاپ، ىسكە اسىرۋ وتە ماڭىزدى. بۇل رەتتە جەرگىلىكتى بيلىك ارنايى جۇمىسشى توبىن قۇرىپ، اتقارىلاتىن شارۋالاردىڭ كەستەسى ءتۇزىلۋى ءتيىس»، - دەدى ج. تۇيمەبايەۆ.
بۇگىندە وبلىس حالقىنىڭ سانى كۇن ساناپ ارتىپ كەلەدى. ياعني تۇتىنۋشى بار جەردە قوقىستىڭ دا ارتا تۇسەتىنى زاڭدىلىق. وسى ماسەلەگە توقتالعان ءوڭىر باسشىسى اتالعان زاۋىتتى تۇركىستان مەن كەنتاۋ قالالارى توڭىرەگىننەن نەمەسە سارىاعاش، ماقتارال اۋداندارىنىڭ ماڭىنان سالۋدى ۇسىندى.
قوناقتار وبلىس باسشىسىنىڭ بۇل ۇسىنىسىن قابىل الىپ، اتالعان اۋماقتارعا ارنايى بارىپ تانىسىپ قايتۋعا نيەتتى ەكەندىكتەرىن جەتكىزدى.
وقو اكىمىنىڭ باسپا ءسوز قىزمەتى
https://dalanews.kz/25325
