Elorda áýejaıyn odan ári damytýǵa 1,1 mlrd dollar ınvestısıa tartylady, dep habarlaıdy Dalanews.kz.
QR Kólik mınıstrligi men Terminals Astana Airport Limited kompanıasy (Terminals holding quramyna kiredi, BAÁ) áýejaıdy jáne oǵan irgeles aýmaqty keshendi damytýǵa baǵyttalǵan ınvestısıalyq kelisim jasasty. Investısıanyń jalpy quny 1,1 mlrd dollardy quraıdy.
Kelisim aıasynda ınvestor ekinshi ushý-qoný jolaǵyn, úshinshi jolaýshylar termınalyn, sondaı-aq júkterge arnalǵan cargo termınalyn salady. Sondaı-aq, ınvestor ındýstrıalyq - logıstıkalyq aımaǵy men qonaq úıleri, saýda alańdary, logıstıkalyq termınaldary bar bıznes-klasterdi qamtıtyn kópfýnksıonaldy aerotropolıs kesheshin damytýdy josparlap otyr.
Budan basqa, arnaıy tehnıka parkin jańartý, sıfrlyq sheshimder men avtomattandyrý júıelerin engizý, áýejaı qyzmetkerlerin kezeń-kezeńimen oqytyp, biliktilikti arttyrý jumystary josparlandy. Qyzmetkerler halyqaralyq avıasıalyq talaptarǵa sáıkes arnaıy trenıńterden ótedi.
Sonymen qatar QR Kólik mınıstrligi men BAÁ Energetıka jáne ınfraqurylym mınıstrligi arasynda avtomobıl kóligi salasyndaǵy yntymaqtastyq týraly ózara túsinistik týraly Memorandýmǵa qol qoıyldy. Taraptar tehnıkalyq bilimmen, daǵdylarmen jáne ozyq tájirıbe almasýǵa nıetti. Jaqyn arada QR men BAÁ arasyndaǵy avtomobıl kóligimen halyqaralyq tasymaldaý máselelerin reglamentteýge múmkindik beretin Úkimetaralyq kelisimge qol qoıylady dep kútilýde.
Qazirgi tańda Qazaqstan halyqaralyq avtotasymaldaý aıasynda 42 Úkimetaralyq kelisim jasasty.
