Aqtóbe oblystyq soty jylqyshy bolyp jumys istegen azamatqa qatysty qylmystyq isti apelliatsiialyq tártippen qaita qarap, birinshi satydaǵy sot úkimin ózgertti. Sonyń nátijesinde sottalǵan azamat sot zalynan bosatyldy, dep habarlaidy dalanews.kz.
Is materialdaryna sáikes, Muǵaljar aýdanyndaǵy sharýa qojalyǵynda jylqyshy bolyp jumys istegen S.-ǵa 2023–2024 jyldary ózine senip tapsyrylǵan 39 bas jylqyny satyp, qojalyq iesine 30 million teńge kóleminde shyǵyn keltirdi degen aiyp taǵylǵan.
Osyǵan bailanysty birinshi satydaǵy sot ony Qylmystyq kodekstiń 189-baby 4-bóligi 2)-tarmaǵy boiynsha kináli dep tanyp, 7 jylǵa bas bostandyǵynan aiyrǵan. Sonymen qatar jábirlenýshiniń paidasyna 30 million teńge óndirip berý týraly sheshim shyǵarylǵan.
Alaida sottalýshynyń qorǵaýshysy úkimmen kelispei, apelliatsiialyq shaǵym túsirgen.
Isti qaita qaraǵan Aqtóbe oblystyq sotynyń qylmystyq ister jónindegi sot alqasy barlyq dáleldemeni zerttep, aiyptyń tolyq kólemde dáleldenbegenin anyqtady.
"Sot alqasy bir bas jylqyny jymqyrý faktisi dáleldengenimen, qalǵan 39 bas jylqy boiynsha mundai jetkilikti dáleldemeler usynylmaǵan degen qorytyndyǵa keldi", - dep málimdedi Aqtóbe oblystyq sotynyń baspasóz qyzmeti.
Osyǵan bailanysty sottalýshynyń áreketi Qylmystyq kodekstiń 189-baby 4-bóligi 2)-tarmaǵynan 189-baptyń 1-bóligine qaita saralandy. Nátijesinde 7 jylǵa bas bostandyǵynan aiyrý jazasy 6 aiǵa bas bostandyǵyn shekteý jazasyna aýystyryldy.
Sonymen qatar sot oǵan raqymshylyq týraly zańdy qoldandy.
"Raqymshylyq jasaý týraly” Zań qoldanylyp, jaza merzimi 3 aiǵa deiin qysqartyldy. Sottalǵan adamnyń qamaýda bolǵan ýaqyty jaza merzimine eseptelip, taǵaiyndalǵan jaza tolyq ótelgen dep tanyldy. Osyǵan bailanysty ol sot zalynan dereý bosatyldy", - delingen sottyń habarlamasynda.
Apelliatsiialyq sot azamattyq talapty da qaita qarap, jábirlenýshige óndiriletin materialdyq shyǵyn kólemin 30 million teńgeden 600 myń teńgege deiin azaitty.
"Jábirlenýshiniń paidasyna óndirilgen materialdyq zalaldyń mólsheri 30 mln teńgeden dáleldengen bir bas jylqynyń qunyna sáikes 600 myń teńgege deiin azaityldy", - dep habarlady Aqtóbe oblystyq sotynyń baspasóz qyzmeti.
Apelliatsiialyq sot alqasynyń qaýlysy zańdy kúshine endi.
