Aqtóbedegi Ulttyq ulannyń áskeri bóliminde qyzmet etip júrgen merzimdi áskeri qyzmetshi ózin birneshe ret soqqyǵa jyqqanyn aityp, politsiiaǵa aryz jazdy. Qazir atalǵan fakti boiynsha sotqa deiingi tergeý júrgizilip jatyr, dep habarlaidy dalanews.kz.
Lada.kz málimetinshe, Aqtaý qalasynyń 18 jastaǵy turǵyny Dosymbet Erkebulan 3 shildede ásker qataryna shaqyrylyp, qazirgi ýaqytta Aqtóbedegi Ulttyq ulannyń №6655 áskeri bóliminde qyzmet atqaryp júr.
Sarbazdyń anasy Gúldana Ketibaevanyń aitýynsha, 4 qyrkúiekte oǵan aýrýhanadan habarlasyp, ulynyń úsh kúnnen beri em qabyldap jatqanyn jetkizgen.
Alǵashynda jas jigitti ýrolog teksergenimen, taldaýlardan eshqandai infektsiia anyqtalmaǵan. Keiin travmatolog maman shaqyrylyp, qýyqtaǵy máselelerdiń jaraqat saldarynan bolýy múmkin ekenin aitqan.
Dárigermen áńgimeden keiin sarbaz anasyna áskeri bólimde ózin mezgil-mezgil uryp-soqqanyn moiyndaǵan. Osydan soń travmatolog politsiia qyzmetkerlerin shaqyrǵan. Áskeri qyzmetshi aryz jazyp, keiin anasymen beinebailanys arqyly sóilesken kezde ony aǵa serjant pen taǵy eki serjanttyń soqqyǵa jyqqanyn málimdegen.
Sarbazdyń anasy týystarymen birge Aqtaýdan Aqtóbege shuǵyl túrde barýǵa nietti ekenin aitty.
Oqiǵaǵa qatysty Ulttyq ulannyń baspasóz qyzmeti pikir bildirip, qazirgi ýaqytta QR IIM Batys óńirlik áskeri-tergeý basqarmasy sotqa deiingi tergeý júrgizip jatqanyn habarlady.
Vedomstvonyń málimetinshe, bolǵan jaǵdaidyń barlyq mán-jaiy anyqtalýda.
«Jan-jaqty jáne obektivti tekserý nátijeleri boiynsha tiisti quqyqtyq baǵa beriledi», – delingen Ulttyq ulan habarlamasynda.
