Aqtóbede 38 jastaǵy zańger sintetikalyq esirtkini ótkizý maqsatynda zańsyz saqtaǵany úshin 7 jylǵa bas bostandyǵynan aiyryldy, dep habarlaidy dalanews.kz.
"Diapazon" basylymynyń málimetinshe, politseiler kúdiktiniń kóligin tintý kezinde sintetikalyq esirtki salynǵan 40 oramany tapqan. Budan bólek, onyń garajy men úiinen de birneshe zip-paketke salynǵan esirtki tárkilengen.
Aiyptalýshy sotta esirtkini kósheden taýyp alǵanyn aitty. Onyń sózinshe, garajdardyń mańynan kúmándi túiinshekti kórip, onyń «zakladka» ekenin birden túsingen. Keiin internetten esirtkiniń túri men qoldanylýy týraly aqparat izdep, aqsha tabý maqsatynda satýǵa bel býǵan. Sol úshin elektrondy tarazy men arnaiy paketter satyp alyp, esirtkini birneshe bólikke bólip qaptaǵan. Onyń bir bóligin úiinde, bir bóligin kóliginde, qalǵanyn garajda saqtaǵanyn jetkizdi.
Alaida, aiyptalýshynyń aitýynsha, internet-dúkendermen bailanysy bolmaǵandyqtan, esirtkini satyp úlgermegen. Kóp uzamai politsiia qyzmetkerleri ony ustaǵan. Sondai-aq ol keide esirtki qoldanatynyn, biraq táýeldiligi joq ekenin aityp, jasaǵan isine ókinetinin málimdegen.
Sot onyń esirtkini ótkizý maqsatynda zańsyz saqtaǵanyn dáleldengen dep tanyp, 7 jyl merzimge bas bostandyǵynan aiyrý týraly úkim shyǵardy.
