Aqtóbede 13 jastaǵy qyz tisin juldyrǵannan keiin densaýlyǵy syr berip, oǵan eki ret ota jasalǵan. Ata-anasynyń aryzyn qaraǵan sot balanyń paidasyna 4 mln teńge moraldyq ótemaqy óndirý týraly sheshim shyǵardy, dep habarlaidy dalanews.kz.
Hronika.kz málimetinshe, qyz ata-anasymen birge 2025 jylǵy 11 aqpanda doktor "Disikýsh" stomatologiiasyna barǵan. Dáriger onyń tisin julǵannan keiin balanyń sol jaq beti isinip, aýzyn ashýy qiyndaǵan. Bir aptadan soń sol klinikada túsirilgen rentgen tis túbiriniń tolyq alynbaǵanyn jáne onyń joǵarǵy jaq qýysyna túsip ketkenin kórsetken. Keiin túbirdi klinikanyń basqa dárigeri alyp tastaǵan.
Oblystyq meditsinalyq jáne farmatsevtikalyq baqylaý departamentiniń tekserisine sáikes, ekinshi emsharadan keiin túbir ornalasqan jol ashyq qalǵan. Oǵan tamaq qaldyqtary túsip, qabyný qaita kúsheigen. Birneshe kúnnen soń qyzdyń boiynda álsizdik paida bolyp, irińdi oshaq anyqtalǵan. Aýrýhanaǵa jetkizilgen balaǵa jaq-bet hirýrgiiasy bóliminde eki ret ota jasalǵan. Keiin oǵan sozylmaly osteomielit diagnozy qoiylǵan.
Tekserý kezinde alǵashqy emsharany jasaǵan dáriger tistiń tolyq alynǵanyna kóz jetkizbegeni jáne baqylaý rentgenin túsirmegeni anyqtaldy. Sarapshylardyń qorytyndysy boiynsha, qalǵan túbirdi alý arnaiy bólimshede, statsionar jaǵdaiynda júrgizilýi tiis bolǵan. Sondai-aq klinikanyń balalarǵa ambýlatoriialyq kómek kórsetý, diagnostikalyq qyzmet pen rentgen jasaýǵa qajetti litsenziialyq qosymshalary bolmaǵany belgili boldy.
Sotta meditsina qyzmetkerleri kinásin moiyndamai, balanyń jaǵdaiyn ata-anasynyń qaraýsyz qaldyrýymen bailanystyrǵan. Alaida sot qyzdyń talap-aryzyn qanaǵattandyryp, klinikanyń quryltaishysy "Ai-Altyn" JShS-nen onyń paidasyna 4 mln teńge moraldyq ótemaqy óndirýdi sheshti.
Sot sheshimi ázirge zańdy kúshine engen joq.
