Aqtóbede sý tasqyny maýsymyna daiyndyq máselesi boiynsha kóshpeli alqa otyrysy ótip, óńirdegi barlyq jaýapty organdarǵa naqty tapsyrmalar júkteldi, dep habarlaidy Dala News.
Jiyndy ashqan oblys prokýrory Marat Ábishev sý tasqynyna qarsy is-sharalardy uiymdastyrý barysynda quqyq buzýshylyqtarǵa jol bermeý qajettigin qatań eskertti. Ol gidrotehnikalyq qurylystardyń, eldi mekenderdi qorǵaityn injenerlik nysandardyń, avtojoldar men kópirlerdiń jai-kúiin turaqty baqylaýda ustaý kerektigin atap ótti. Sondai-aq evakýatsiialyq pýnktter men jaýapty qyzmetterdiń jedel áreket etýge tolyq daiyn bolýy talap etildi.
Oblys ákimi Ashat Shaharov sý tasqynyna qarsy jumystar erekshe baqylaýda ekenin aityp, barlyq ýákiletti organdarǵa úilesimdi vedomstvoaralyq is-qimyl men jedel aqparat almasýdy kúsheitýdi tapsyrdy. Ásirese sý basý qaýpi bar aimaqtardan halyqty ýaqytyly kóshirý jáne alǵashqy meditsinalyq-áleýmettik kómekti uiymdastyrý máselesine basymdyq berildi.
Tótenshe jaǵdailar departamentiniń basshysy Qaharman Orazalin óńirdegi qazirgi ahýal týraly baiandady. Aimaqta jedel shtabtar qurylǵan, «jedel jeli» jumys istep tur, táýlik boiy kezekshilik uiymdastyrylǵan.
Qazirdiń ózinde tasqyn jaǵdaiyna áreket etý úshin 2 myńnan astam qyzmetker, 800-den astam tehnika jáne 8 áýe kemesi daiyndyqqa keltirilgen. Sonymen qatar 19 birlik jańa tehnika – aerolodkalar, jedel áreket etý kóligi, gidrotsiklder men qaiyqtar satyp alynǵan.
Politsiia organdary qoǵamdyq qaýipsizdikti qamtamasyz etýge jáne tótenshe jaǵdai saldaryn joiý kezinde quqyqtyq tártipti saqtaýǵa baǵyttalǵan.
Keńes qorytyndysy boiynsha memlekettik organdarǵa yqtimal tótenshe jaǵdailarǵa jedel áreket etý jáne halyqqa keletin shyǵyndy barynsha azaitý jóninde naqty tapsyrmalar berildi.
