Aqtóbe oblysynyń Qylmystyq ister jónindegi mamandandyrylǵan aýdanaralyq soty 62 jastaǵy Tóken Aimuqatovqa qatysty rezonans týdyrǵan is boiynsha úkim shyǵardy, dep habarlaidy dalanews.kz.
Halyqstan málimetinshe, ol biyl aqpan aiynda 55 jastaǵy tanysyn óltirip, birneshe kúnnen keiin máiitti sómkege salyp, kórshi aýlanyń qoqys alańyna aparyp tastaǵan.
Qylmys ishimdik ishkennen keiin bolǵan
Is materialdaryna sáikes, qaiǵyly oqiǵa spirttik ishimdik ishilgen otyrystan keiin bolǵan. Eki er adamnyń arasynda janjal týyndap, sonyń barysynda Aimuqatov tanysyna birneshe soqqy jasap, ony ólimge ákelgen.
Birneshe kún ótken soń máiit buzyla bastaǵan kezde sottalýshy ony búktep, skotchpen orap, qara-aq tústi úlken sómkege salyp, kórshi aýlanyń qoqys alańyna aparyp qaldyrǵan.
Máiit qoqys alańynda taǵy birneshe kún jatqan. Ony 12 naýryz kúni politsiia qyzmetkerleri tapqan.
Sot 14 jylǵa bas bostandyǵynan aiyrdy
Quqyq qorǵaý organdary men sot bul qylmysty tórt ai ishinde ashyp, kúdiktiniń kinásin dáleldegen.
Sot úkimimen Tóken Aimuqatov ortasha qaýipsizdik mekemesinde 14 jyl merzimge bas bostandyǵynan aiyryldy.
Sondai-aq sot ony marqumnyń týystaryna 2 million teńge kóleminde moraldyq ótemaqy tóleýge mindettedi. Bul somany erikti túrde óteý úshin sottalǵanǵa jeti kún merzim berilgen.
Budan bólek, odan 1,3 million teńgege jýyq protsessýaldyq shyǵyn óndiriledi.
Aiǵaq zattary joiylady
Sottyń sheshimimen is boiynsha aiǵaqty zattar, onyń ishinde linoleým, legen, kilemshe, nasybai jáne marqumnyń kiimderi joiylatyn boldy.
Sottalýshy óz kinásin ishinara moiyndady.
Úkim zańdy kúshine engen joq. Oǵan 15 táýlik ishinde apelliatsiialyq shaǵym berýge bolady.
