Aqtóbedegi Ulttyq ulannyń 6655 áskeri bóliminde qyzmet etken áskeri qyzmetker qumar oiyndarǵa táýeldi bolǵany úshin qyzmetinen bosatyldy. Bul sheshimmen kelispegen ol sotqa júgingenimen, talap-aryzy qanaǵattandyrylmady, dep habarlaidy dalanews.kz.
Is materialdaryna sáikes, áskeri qyzmetkerdiń buǵan deiingi qyzmetinde kóptegen marapattary men kótermeleýleri bolǵan. Alaida ótken jyldyń kúzinde ol teris sebeptermen zapasqa shyǵarylyp, keiin jeke quram tiziminen alynyp, barlyq materialdyq qamtamasyz etý túrlerinen aiyrylǵan.
Talapker jumystan zańsyz shyǵarylǵanyn aityp, buiryq shyǵarylǵan kezde eńbekke ýaqytsha jaramsyzdyq paraǵynda bolǵanyn alǵa tartty. Sondai-aq ol qumar oiyndarǵa ózi qatyspaǵanyn, býkmekerlik stavkalardy dosy jasaǵanyn, al ózi tek oǵan qaryzǵa aqsha bergenin málimdedi. Osyǵan bailanysty burynǵy qyzmetine qaita ornalastyrýdy jáne jumyssyz júrgen kezeń úshin jalaqy óndirýdi surady.
Alaida áskeri bólim talappen kelispedi. Jaýapkerdiń málimetinshe, 2024 jyldyń kókteminde áskeri politsiia atalǵan qyzmetkerdiń 4,2 million teńge kóleminde qumar oiyndarǵa qatysqanyna bailanysty oǵan qatysty usynys engizgen. Soǵan qaramastan, ol 2025 jyly da býkmekerlik stavkalar jasaýdy jalǵastyrǵan.
Sot barysynda talapker basshylyqty eńbekke jaramsyzdyq paraǵynda júrgeni týraly ýaqytynda habardar etkenin dáleldei almady. Buǵan qosa, 2025 jyly onyń bank shotyna býkmekerlik keńselerden utys retinde aqsha túskeni anyqtalǵan. Is barysynda talapkerdiń ýájderindegi ózge de sáikessizdikter eskerildi.
Nátijesinde sot áskeri qyzmetkerdiń talap-aryzyn qanaǵattandyrýdan bas tartty. Sot sheshimi zańdy kúshine endi.
