Aqtóbe oblysynda esinen tanyp, qulaǵan 28 jastaǵy muǵalim psihiatriialyq aýrýhanadan bir-aq shyqty. Aqnur Shákir ózin emhanada kúshtep ustap, dári qabyldaýǵa májbúr etkenin aitady, dep habarlaidy Dalanews.kz.
Pedagog bes ai buryn ana atanǵan. Jeti jyl nekeden keiin EKO arqyly dúniege kelgen bala kópten kútken armandary da eken. Jańa týǵan sábidiń qyrqynan shyqqansha mazasyz bolatyny belgili. Áieldiń aitýynsha, ótken birneshe uiqysyz túnnen keiin ózin nashar sezinip, esin de joǵaltqan. Kúieýi aýyldyq medbikeni shaqyrǵan. Alaida bári kútpegen jaǵdai oryn alyp, áieldi psihiatriialyq aýrýhanaǵa bir-aq alyp ketken, dep habarlaidy KTK.
"Aldymen olar meni Alǵalydaǵy aýrýhanaǵa alyp keldi. Ol jerde meni birneshe dáriger tekserip, Aqtóbege baryp analiz tapsyrý kerektigimdi aitty. Men esh oilanbastan qalaǵa bardym. Biraq sońynda meni aldap, psihiatriialyq aýrýhanaǵa qamap tastady. Men túni boiy sol jerde boldym. Uiyqtamadym. Tipti, janymda shyn naýqastar da boldy, saý ekenimdi aityp, olardyń barlyq testiden ótsem de meni májúrlep, dári ishkizdi", - deidi Aqnur Shákir.
Bolǵan jaǵdaiǵa alańdaǵan Aqnurdyń ata-anasy qyzynyń nelikten psihiatriialyq emhanaǵa túskenin anyqtaýǵa tyrysqan. Olardyń aitýynsha, dárigerler muny bosanǵannan keiingi depressiiamen bailanystyrady.
"Psihiatriialyq aýrýhanada onyń bosanǵannan keiingi kúizeliske ushyraǵanyn, 21 kún emdeletinin aitty. Al oǵan deiin ony bosata almaityndaryn, bul zańdy ekenin de naqtylady. Sodan 911-ge habarlastyq. Ýchaskelik politsiia qyzmetkeri keldi, biraq ol kómektese almaitynyn aitty. Men onyń bes ailyq ulyn qolymda ustap otyryp, jyladym. Sosyn dárigerler balany tartyp alyp, balalar úiine tapsyramyz dep qorqytty", - deidi muǵalimniń anasy Gúlden Jáýtimova.
Aqnurdyń eshqaida tirkeýde turmaǵanyna qaramastan aýrýhanadaǵylar dárigerlik qupiiaǵa júgine otyryp, ony aýrýhanaǵa jatqyzý sebebin túsindirýden bas tartqan.
Gúlmira Orazova, Aqtóbe oblystyq psihikalyq densaýlyq ortalyǵy direktorynyń orynbasary:
- Aqnurdy psihiatriialyq aýrýhanaǵa jetkizgen Alǵa aýdandyq aýrýhanasynyń meńgerýshisi áieldi sebepsizden sebepsiz jierip otyrǵan joq. Alaida onyń diagnozyn ashyp aitýǵa bolmaidy. Biraq olar alańdaýshylyq týdyratyn belgiler bolǵanyn aitady. Sondyqtan jas anany dereý aýrýhanaǵa jatqyzýǵa týra keldi.
"Týystarynyń shaǵymy boiynsha naýqas Alǵa ortalyq aýdandyq aýrýhanasyna jetkizildi. Biz ony ári qarai tekserý jáne emdeý úshin mamandandyrylǵan emhanaǵa jiberdik", - deidi alǵalyq dárigerler.
Aqnur qazir ata-anasymen ýaqytsha turyp jatyr. Ol kúieýiniń qolhatymen psihiatriialyq dispanserden bosap shyqqan. Jas ustazdyń endigi úlken qorqynyshy – emhanada bolǵan qorqynyshty tún artta qalmai, alda da jumysynda qiyndyqtar týǵyzýy múmkin be dep sekemdenedi.
