Aqtóbede sot QR İİM áskerı tergeý basqarmasynyń bastyǵy men aǵa tergeýshini para talap etkeni úshin tıisinshe toǵyz jáne segiz jylǵa bas bostandyǵynan aıyrdy, dep habarlaıdy Dalanews.kz Áskerı sottyń baspasóz qyzmetine siltep. 

«Aqtóbe garnızonynyń áskerı sotynda QR İİM áskerı tergeý basqarmasynyń Batys óńirlik basqarmasynyń bastyǵy «D» men aǵa tergeýshi «S»-ǵa qatysty Qylmystyq kodekstiń 366-baby 3-bóliginiń 1 jáne 2-tarmaqtaryna (para alý) sáıkes qylmys jasaǵany úshin qylmystyq is qaraldy. (…) Sot úkimimen «D» toǵyz jylǵa, al «S» segiz jylǵa bas bostandyǵynan aıyryldy. Ekeýi de ómir boıyna belgili bir laýazymdardy atqarý jáne belgili bir qyzmetpen aınalysý quqyǵynan aıyryldy», – delingen habarlamada.

Sot materıaldaryna sáıkes, Batys óńirlik basqarmasynyń bastyǵy men aǵa tergeýshi 2024 jylǵy jeltoqsanda kýágerden 1 mıllıon teńge kóleminde para talap etken. Olar er adamdy jumystan shyǵaramyz jáne basqa da saldarlar bolady dep qorqytqan. 24 jeltoqsanda kúdiktiler 700 myń teńge alǵan sátinde ustaldy.

Aıyptalýshylar kinásin tolyq moıyndamaǵan.

Ekeýi de áskerı shenderinen aıyryldy.