Aqtóbe halqy beibit sherýge shyqty
- Kelgen adam qarasy barǵan saiyn kóbeiip jatyr. Basynda bir ǵana adam sóilep tur edi, kóptiń aldynda sóilegisi kelgen adamdar kóbeiip ketti. Ákimshilik ókilderi mitingtiń qatysýshylaryna ainaldy. Halyqty toqtata almai jatyr, - deidi Olga Klimonova. Jinalǵandar arasynda eresek adamdar, fermerler, jastar bar.
Azattyq tilshisi Klimonovamen sóilesip turǵan kezde tutqanyń arǵy jaǵynan ysqyryqtar men halyqtyń urandap jatqany estildi.
Olga Klimonovanyń aitýynsha, keshe, iaǵni sáýirdiń 26-sy kúni áleýmettik jelide miting ótetini týraly habarlama bolǵan. Búgin túski saǵat birden soń jurt Birinshi prezident atyndaǵy park tóńiregine jinala bastaǵan. Áýeli mitingke kelgen adamdardy «saiabaqty dárileimiz» dep kirgizbei qoiǵan. Turǵyndar mitingti trotaýarda ótkize bastaǵannan keiin ákimshilik ókildiri parkke kirýge ruqsat bergen.
Semeide de búgin tústen keiin jer daýyna qatysty shamamen ondaǵan adam jinalǵan miting boldy. Jiynǵa qatysqan Maqsat Jánibek esimdi turǵynnyń Azattyqqa aitýynsha, qala ákimi kelip "talaptaryńyzdy jazbasha jetkizińizder, joǵary jaqqa jetkizemiz" degen soń turǵyndar hatqa qol qoiyp bergen. Qazir aqyryndap tarap jatyr.
Búgin Semei qalalyq prokýratýrasy men ákimdigi ruqsat etilmegen jiyn ótkizbeý týraly eskertý jasaǵan.
Qazaqstan úkimeti ótken aida jer týraly zańǵa byltyr kúzde engizilgen ózgeristerge sai biyl shildeden bastap aýyl sharýashylyq jerlerin azamattarǵa jeke menshikke aýktsion arqyly satý, sonymen birge sheteldikter men azamattyǵy joq adamdarǵa 25 jylǵa deiin merzimge jalǵa berý tártibi kúshine enedi dep habarlaǵan.
Jer satý men sheteldikterge jerdi jalǵa berý jónindegi úkimet bastamasyna qarsy buǵan deiin ziialylardyń talap-haty jariialanyp, Astana men Oralda belsendi azamattardyń jalǵyz adamdyq piketteri men Almatyda shaǵyn jiyn ótken. 24 sáýirde Atyraýda jerge qatysty birneshe myń adam jinalǵan mitingbolǵan. Al 26 sáýirde Almatynyń "Astana" alańynda jerdi jalǵa berýge qarsy jalǵyz adamdyq piketke shyqqan turǵyndy politsiia ustap áketken.
