Aqtóbe oblysynda Samara – Shymkent tasjolynda bolǵan jol-kólik oqiǵasy saldarynan «Qazhrom» TUK» AQ-nyń úsh qyzmetkeri kóz jumdy, dep habarlaidy dalanews.kz.
Qaiǵyly oqiǵa 28 shilde kúni Aqtóbe men Hromtaý qalalarynyń arasyndaǵy tasjolda bolǵan. Politsiianyń málimetinshe, Audi jeńil kóligi men júk tasymaldaityn «GAZel» soqtyǵysqan.
Apat saldarynan 25 jastaǵy jeńil kólik júrgizýshisi men bir jolaýshy oqiǵa ornynda qaza tapty. Taǵy bir jolaýshy aýrýhanaǵa jetkizilip bara jatqan jolda kóz jumǵan.
Belgili bolǵandai, qaza tapqan úsh azamat ta Hromtaýdaǵy Don taý-ken baiytý kombinatynda jumys istegen. Olar jumysqa óz kóligimen bara jatqan.
«Qazhrom» TUK» AQ marqumdardyń týǵan-týystary men jaqyndaryna kóńil aitty.
«Jol-kólik oqiǵasynyń mán-jaiy men sebepterin ýákiletti organdar anyqtap jatyr. Kompaniia qaza tapqandardyń týǵan-týystary men jaqyndaryna qaiǵyryp kóńil aitady», dep málimdedi kompaniianyń baspasóz qyzmeti.
Jol apaty kezinde «GAZel» júrgizýshisi de jaraqat alyp, aýrýhanaǵa jetkizilgen. Qazir onyń jaǵdaiy týraly aqparat naqtylanyp jatyr.
