Aqtóbe oblysynyń Yrǵyz aýdanynda iri qara arasynda qaýipti juqpaly aýrýlar anyqtaldy. Sonyń saldarynan 50-den astam mal qyryldy, dep habarlaidy dalanews.kz.
"Diapazon" basylymynyń málimetinshe, Sheńbertal men Qurylys aýyldarynda mal belgisiz dertke shaldyǵyp, jappai qyryla bastaǵan. Osydan keiin mamandar ólgen 51 maldan synama alyp, zerthanalyq tekserý júrgizgen.
"Saraptama qorytyndysy boiynsha maldan teilerioz, piroplazmoz jáne keibirinen leptospiroz anyqtalǵan", - deidi basylym.
Veterinarlardyń túsindirýinshe, teilerioz ben piroplazmoz – kene shaqqan kezde juǵatyn aýrýlar. Al leptospirozdy egeýquiryq pen tyshqan siiaqty kemirgishter taratady. Bul dert kóbine kemirgishter júrgen shalshyqtan nemese las sý kózderinen sý ishken malǵa juǵady.
Aýrýǵa shaldyqqan maldyń qyzýy kóterilip, jem-shóp jemei qoiady, álsireidi.
22 shildede aýdanǵa Veterinariialyq baqylaý jáne qadaǵalaý komiteti men oblystyq veterinariia basqarmasynyń mamandary bardy. Qazir olar aýrý anyqtalǵan aýyldarda túsindirý jumystaryn júrgizip, aýrý maldy oqshaýlap, emdeý sharalaryn qolǵa alǵan.
Qyrylǵan maldyń barlyǵy arnaiy insinerator peshinde joiylyp, aýrý shyqqan jerler tolyqtai zalalsyzdandyryldy.
Mamandar mal ielerine kenege qarsy dárileý jumystaryn ýaqytyly júrgizýge, maldy qaraýsyz jaimaýǵa jáne aýrý belgileri baiqalsa, birden veterinarlarǵa habarlasýǵa keńes berdi.
Oblystyq veterinariia basqarmasynyń málimetinshe, qazirgi tańda Yrǵyz aýdanyndaǵy epizootiialyq jaǵdai baqylaýda.
