Aqtóbe oblysynyń Baiǵanin aýdanynda joiqyn daýyldan keiin qalpyna keltirý jumystary jalǵasýda. Aldyn ala málimet boiynsha, tabiǵi apat saldarynan 298 nysan búlindi, dep habarlaidy dalanews.kz.
Aqtóbe oblysy ákimdiginiń málimetinshe, óńir basshysy Ashat Shaharovtyń tóraǵalyǵymen ótken arnaiy keńeste qalpyna keltirý jumystarynyń barysy qaraldy.
Aldyn ala baǵalaý nátijesinde daýyldan 254 turǵyn úi, 14 áleýmettik nysan, 24 saýda orny jáne 6 ákimshilik ǵimarat zaqymdanǵany anyqtaldy. Mamandar keltirilgen shyǵyn kólemin 27 shildege deiin tolyq eseptep shyǵarýdy josparlap otyr.
Qazirgi tańda Qaraýylkeldi aýylynda gaz, elektr energiiasy men aýyzsý berý tolyq qalpyna keltirildi. Sonymen qatar qatty jelden qulaǵan uialy bailanys munarasyn qalpyna keltirý jumystary júrgizilýde.
Ýaqytsha evakýatsiialaý pýnktine ornalastyrylǵan turǵyndarǵa da qajetti jaǵdai jasalǵan. Qazirgi ýaqytta mektep-internat ǵimaratynda alty otbasy ornalastyrylǵan.
Eske salaiyq, ótken aptada Baiǵanin aýdanynyń Qaraýylkeldi aýylynda qatty daýyl saldarynan uialy bailanys munarasy dúkenniń ústine qulap, birneshe adam zardap shekken bolatyn. Osyǵan bailanysty óńirde jergilikti aýqymdaǵy tabiǵi sipattaǵy tótenshe jaǵdai jariialandy.
