Aqtóbe oblysynda mal azyǵy qymbattap, fermerlerdiń shyǵyny eki esege ósti. Janýar ieleri endi ettiń baǵasyn kóterýge májbúr ekenin málimdedi, dep habarlaidy Dalanews.kz.
Qazir bir tonna kebektiń baǵasy – 90 myń teńge, bir túk shóp – 12 myń teńgeden asyp ketti. Fermerlerdiń aitýynsha, olardyń shyǵyny tabystan áldeqaida artyp otyr.
"Basqa amal joq, et baǵasyn kóterýge týra keledi. Biyl Aqtóbe oblysynda ónimdilik óte tómen boldy. Munda diirmender jumys isteidi. Bidaidy 100–110 teńgeden qabyldap, kebekti 90 myń teńgeden satyp otyr. Antimonopoliia komiteti nemen ainalysyp otyrǵany belgisiz. Endi ne isteimiz, maldy nemen qorektendiremiz?", – deidi sharýa qojalyǵynyń iesi Samat Qaldyqulov.
Mal ieleriniń aitýynsha, sońǵy úsh jylda jem-shópke beriletin sýbsidiia toqtaǵan. Keibireýleri aýyl sharýashylyǵyna arnalǵan jeńildetilgen nesie ala almai otyr.
Aimaqtyq Básekelestikti qorǵaý jáne damytý agenttiginiń departamenti tekserý júrgizetinin habarlady.
"Aqtóbe oblysynda kebek satatyn eki JShS bar. "Ramazan" JShS-de baǵa ózgermegen. Al "Novo-Áljan diirmeninde" baǵalar ósken. Qazirgi tańda antimonopoliialyq sharalar qabyldanyp jatyr, monitoring jalǵasady", – dedi oblystyq departament basshysynyń orynbasary Maia Ábilqairova.
Qazir Aqtóbede siyr etiniń bir kelisi shamamen 5000 teńge, jylqy eti – 4000 teńge. Fermerlerdiń aitýynsha, olar etti bar bolǵany 2900–3000 teńgeden ótkizedi, bul jem-shóp shyǵynyn jappaidy.
