Aqtóbe oblysynda úsh «TANK» jol talǵamaıtyn kóligin aýdan ákimdikteri satyp alǵan. Memlekettik satyp alýlarǵa qoıylǵan talaptar arasynda massaj, jeldetý jáne oryndyqtardy jylytý fýnksıasy, premıým akýstıkalyq júıe sekildi tarmaqtar bar, dep habarlaıdy Dalanews.kz Ulysmedia.kz-ke siltep. 

«Dıapazon» basylymynyń habarlaýynsha, Baıǵanın aýdany ákimdigi «Haval Tank 500» jol talǵamaıtyn kóligin «qyzmettik qajettilikter» úshin 27 mln teńgege satyp alǵan. Sonymen qatar, 5 aqpanda Yrǵyz aýdany ákimdigine 26 500 000 teńgege qyzmettik jol talǵamaıtyn kólik satyp alynǵany anyqtaldy. Avtokólik sıpattamalary uqsas: aldyńǵy jáne artqy qatar oryndyqtarynyń massaj jáne jeldetý fýnksıalary, premıým akýstıkalyq júıe, oryndyqtary NAPPA terisimen qaptalǵan.

Áıteke bı aýdany ákimdigi úshin memlekettik satyp alýlar saıtynda 24,107 mln teńgege qyzmettik avtokólik satyp alynǵan. Mashına sıpattamalaryna sáıkes, 2024 jyly shyǵarylǵan, aldyńǵy jáne artqy qatar oryndyqtary jylytylǵan, aınalmaly kamera jáne 8 dınamık akýstıkalyq júıesi bar.

Barlyq satyp alýlar nátıjesinde «TANK 500» jol talǵamaıtyn kólikteri satyp alyndy.