Premer-ministrdiń orynbasary Qanat Bozymbaev Aqtaýda Azerbaijan Airlines ushaǵy apatqa ushyraǵan kezde qaza tapqan jolaýshylardyń otbasylaryna qandai ótemaqy tólengenin aitty, dep habarlaidy Dalanews.kz.
Úkimette ótken brifingte jýrnalister vitse-premerden Baký - Groznyi baǵyty boiynsha ushqan ushaq jolaýshylarynyń qaza tapqan otbasylaryna qandai kómek kórsetilgenin surady.
“Ár otbasyna tiisti soma tólendi. Jerleý rásimderi jáne basqa da máselelerdi bizdiń áriptesterimiz óz moinyna aldy. Oqiǵa ornyna barý jáne olardyń tasymaldanýy qamtamasyz etildi. Qazirgi ýaqytta demeýshilik kómektiń arqasynda qaza tapqandardyń otbasylaryna tiisti qoldaý kórsetiledi. Otbasy múshelerine shamamen 5 million teńge tólenýi kerek edi. Oǵan qosa, jerleý shyǵyndary, máiitti tasymaldaý, jol shyǵyndary bar, bul tólemder osymen shektelmeidi”, – dedi Bozymbaev.
Aita keteiik, 2024 jyly 25 jeltoqsanda jergilikti ýaqyt boiynsha 11.30-da Aqtaý mańynda Bakýden Groznyiǵa ushyp bara jatqan ushaq apatqa ushyrady. Bul - Azerbaijan Airlines áýekompaniiasyna tiesili Embraer 190 ushaǵy.
Aqparat boiynsha ushaq bortynda 67 adam, onyń ishinde 5 ekipaj múshesi bolǵan.
Apattan 6 qazaqstandyq kóz jumdy. Jalpy qaza tapqandar sany — 38. Qaiǵyly oqiǵadan 29 adam aman qaldy.
Qaiǵyly oqiǵadan keiin Ázerbaijanda Jalpyulttyq aza tutý kúni jariialandy. Túste búkil el boiynsha memlekettik týlar túsirilip, kólikter toqtady. Ázerbaijandyqtar qaza tapqandardy bir minýt únsizdikpen eske aldy.
