Aqtaýda tirkelmegen meditsinalyq buiymdardy paidalanǵan meditsinalyq ortalyq ákimshilik jaýapkershilikke tartyldy, dep habarlaidy dalanews.kz.
Aqtaý qalasynyń ákimshilik quqyq buzýshylyqtar jónindegi mamandandyrylǵan sotynyń málimetinshe, is Ákimshilik quqyq buzýshylyq týraly kodekstiń 426-baby 3-bóligi (tirkelmegen nemese qoldanýǵa ruqsat etilmegen dárilik zattar men meditsinalyq buiymdardy óndirý, satyp alý, tasymaldaý, saqtaý, ótkizý, qoldaný nemese jarnamalaý) boiynsha qaralǵan.
Sottyń anyqtaýynsha, 2026 jyldyń shilde aiynda Mańǵystaý oblysy boiynsha Densaýlyq saqtaý ministrligi Meditsinalyq jáne farmatsevtikalyq baqylaý komiteti departamenti turǵynnyń shaǵymynan keiin meditsinalyq ortalyqqa jospardan tys tekserý júrgizgen.
Shaǵymdanýshy 2026 jylǵy 18 mamyrda atalǵan meditsinalyq ortalyqqa meditsinalyq qyzmet alý úshin júgingenin kórsetken. Qyzmet kórsetilgennen keiin onyń densaýlyǵy nasharlaǵan.
Tekserý barysynda meditsinalyq ortalyqtyń tirkelmegen meditsinalyq buiymdardy paidalanǵany anyqtalǵan.
Sot ákimshilik jaza taǵaiyndaý kezinde istiń mán-jaiyn, jaýapkerdiń kinásin tolyq moiyndaǵanyn jáne jaýapkershilikti jeńildetetin mán-jailardyń bar ekenin eskerip, ákimshilik aiyppul mólsherin 30 paiyzǵa qysqartqan.
Nátijesinde jaýapkershiligi shekteýli seriktestikke 605 500 teńge kóleminde ákimshilik aiyppul salyndy.
Budan bólek, meditsinalyq qyzmetpen ainalysýǵa berilgen litsenziianyń qoldanylýy bir ai merzimge toqtatyldy. Sondai-aq ákimshilik quqyq buzýshylyqtyń tikelei zaty bolǵan dárilik zattardy tárkileý jáne joiý týraly sheshim qabyldandy.
Sot otyrysynda meditsinalyq ortalyqtyń ókili kinásin tolyq moiyndaǵan.
Sot qaýlysy ázirge zańdy kúshine engen joq.
