Aqtaýdaǵy Oil Construction Company kásiporny munaıshylarynyń Qazaqstan táýelsiz kásipodaqtar konfederasıasyn (QTKK) tirkeýdi talap etip jarıalaǵan ashtyq aksıasy besinshi kúnge ulasty. Munaıshylardyń keıbiri densaýlyǵynyń syr bere bastaǵanyn, biraq talaptary oryndalmaıynsha nár tatpaıtyndaryn, dárigerlik kómekti de qabyldamaıtyndaryn aıtady.
34 jastaǵy jumysshy Rýslan Ábýovtyń densaýlyǵy kúrt nasharlap ketip, munaıshylar jedel járdem kóligin shaqyrdy. Jumysshylar Oljas Bóleýbaev, Tynyshtyq Sútenov, Nurpeıis Ishmanov, Ǵabıt Jumaǵulov ta densaýlyqtarynyń nasharlaı bastaǵanyn aıtty.
Kezekshi dáriger Sáýle Sáýmenova ashyǵýdyń saldarynan jumysshylar aǵzasynda sýsyzdaný prosesi júrip jatqanyn aıtty. Alaıda munaıshylar aýrýhanaǵa barýdan bas tartyp otyr.
Ońtústik Qazaqstan oblystyq aýdanaralyq ekonomıkalyq soty qańtardyń 4-i kúni keńsesi Shymkent qalasynda ornalasqan Qazaqstan táýelsiz kásipodaqtar konfederasıasyn jabý týraly sheshimin jarıalaǵan.
QTKK quramynda bolǵan Oil Construction Company jumysshylary resmı kásipodaqqa kirgisi kelmeıtinderin aıtyp, táýelsiz kásipodaqty jabýǵa qarsylyq bildirip otyr.
QTKK basshysy Larısa Harkova kásipodaq uıymy bılik belgilegen jarty jyl ishinde qaıta tirkeýden ótip úlgermeı qalǵany sebepti sot sheshimimen jabylǵanyn aıtady. QTKK 2003 jyly "Mańǵystaýmunaıgaz" kompanıasyna qarasty úsh kásiporynnyń negizinde qurylǵan. Kásipodaq uıymynyń dereginshe, onyń quramynda 2100 múshesi bolǵan.
