Stadion alańy ásem bezendirilip, sahna tórine «Týǵan kúnińmen, Aqsý!» jazýy ilindi. Kóńildi mýzyka oinap, kópshilikti shabyttandyra tústi. Merekege myńdaǵan qala turǵyndarymen qatar aýyldan at arytyp kelgender de az bolmady.
Qala kúniniń merekelik saltanatyn Pavlodar oblysy ákiminiń orynbasary Nikolai Dychko ashyp, jinalǵan qaýymdy aitýly kúnmen quttyqtady. Ádettegidei, dýmandy toi laiyqtylardy marapattaý rásiminen bastaldy.
Sonymen qatar, atalmysh merekeniń tabysty ótýine birden-bir sebepker basshylarǵa álemdik rekordtardy tirkeý jónindegi Resei Komitetiniń arnaiy sertifikattary tapsyryldy.
Olar: «Dostyq» fermerlik sharýashylyǵynyń basshysy Hýsein Karimov, Aqsý qalalyq ardagerler keńesiniń tóraǵasy Zalmuhan Arynov, saraptamalyq keńestiń múshesi, №19 qara metallýrgiia kolledjiniń direktory Fedor Kisenkov, bilim bóliminiń basshysy Qairat Smaǵulov, «Nur Otan» partiiasynyń AQF tóraǵasynyń birinshi orynbasary Aidos Orazalin, «EEK» AQ qyzmetkeri Aleksandr Lazov, AFZ-nyń direktory Sergei Prokopev, J.Musa kolledjiniń muǵalimi Aleksei Ponihin jáne «Teploservis-Aqsý», «Aqsý-qalalyq komshar», «Dosýg-servis» kásiporyndary men «Dostyq» stadionynyń basshylary, S.Dónentaev atyndaǵy qalalyq mádeniet saraiynyń direktory Tatiana Trýshkova, IIB ÁPB-niń basshysy Aian Qasymov pen qalalyq kásipkerlik jáne týrizm bóliminiń basshysy Nurlan Sadybekov boldy.
Merekelik baǵdarlamada lotoreia utystary oinalyp, báigege kvadrotsikl qoiyldy. Avto-moto shoý tamashalandy. Kásibi DJ, MC bitbokser, Go.Go jaryq shoýynyń qatysýymen bi keshi uiymdastyryldy. Sondai-aq, elimizge tanymal qazaqstandyq óner juldyzdarynyń biri – «Orda» toby aqsýlyqtarǵa jańa ánderin tartý etip, dýmandy toi otty-pirotehnikalyq shoýmen támamdaldy.
Vadim GORIýNOV,
Jer sharynyń rekordtaryn tirkeý jónindegi Resei Komitetiniń bas arbitry:
– Aqsý qalasynyń ortalyq alańynda tazartylyp, týralǵan 4 tonna 254 keli kartoptan 54 qazanda, bir kúnde 19 myń 254 fri máziri daiyndaldy. «Kartop friin eń kóp kólemde pisirgen» atalymy boiynsha teńdesi joq rekord ornatqan Aqsý qalasynyń ákimi Qairat Núkenov pen qala turǵyndaryn shyn júrekten quttyqtaimyn! Jáne bul atalǵan jetistik álemdik rekordtardy tirkeý jónindegi Resei Komitetiniń biryńǵai halyqtyq tirkeýine engiziletin bolady.
Marat ÁMIRJANOV,
Aqsý qalasynyń qurmetti
azamaty:
– Ózim Astana qalasynyń týmasymyn. Aqsý qalasynda turǵanyma 23 jyl boldy. Súiikti qalamyz kóz aldymyzda jyldan-jylǵa kórkeiip, damyp keledi. Biyl mine, 54 jyldyǵyn da toilap jatyrmyz. Kóńil-kúiimiz óte jaqsy. Bala-shaǵa máz-meiram, kóńilderi toq, budan artyq ne kerek?! Barshańyzǵa aitar tilegim aspanymyz ashyq bolyp, ómirimiz shat bolsyn, elimizdiń mártebesi arta bersin!
Aidyn TÚGELBAEV,
"Teploservis-Aqsý" MKK-niń
direktory:
- Búgin aitýly mereke bolyp jatyr. Eń aldymen, bárińizdi qala kúnimen quttyqtaimyn! Aqsý óńirinde osyndai qýanyshty kúnder kóp bolyp, árdaiym jańa jetistikterge jete bereiik. Negizi, bul sharaǵa daiyndalǵanymyzǵa shamamen 1 aiǵa jýyq ýaqyt boldy. "Jumyla kótergen júk jeńil" degendei, óńirimizdegi barlyq sharýashylyqtar, qala kásipkerleri, memlekettik organ qyzmetkerleri túgeldei óz úlesterin qosty. Mine, uiymdastyrý jumystaryn atqarǵanymyz úshin arnaiy sertifikattarǵa ie boldyq. Mereke kóńilimizden shyqty. Óte qýanyshtymyz!
Serik JAQYPOV,
"Aqsý sý arnasy" MKK-niń
direktory:
- Men barlyq qala turǵyndaryn osynaý mereili kúnderimen quttyqtaimyn! Búgingi maǵan berilgen marapat meniń ǵana emes, búkil "Aqsý sý arnasy" ujymynyń eńbegine berilgen baǵa. Sol qyzmetkerlerdiń eseli eńbeginiń arqasynda bizdiń qala sýdan tarshylyq kórmei keledi. Eńbegimizdi elep, mártebemizdi kótergen qala basshysyna aitar alǵysym sheksiz. Jerimiz, elimiz gúldenip, halqymyz, Otanymyz aman bolsyn!
Aigúl MOLDASh
FOTOREPORTAJ, TÓMENDE.
