«Aqsha bólingen, ákimder qujat daiyndamaǵan». Shaǵyn qalalar ákimderi biliksizdiginen dami almaýda
QR Ulttyq ekonomika vitse-ministri Álisher Ábdiqadyrov habarlaǵandai, biyl 23 qalada 400 shaqyrym jýyq avtomobil joldary men injenerlik jelilerdi jańǵyrtý úshin respýblikalyq biýdjetten 17 mlrd teńge bólinipti. – 27 monoqalada 10 myńǵa jýyq adamdy jumyspen qamtyǵan 60 «zákirli» investitsiialyq joba iske asyrylýda. Sońǵy 3 jylda monoqalalardyń kásipkerlerine berilgen granttar kólemi 3,5 esege (63-ten 218 mln teńgege deiin), sýbsidiialaý – 1,6 esege (8,3-ten 13,5 mlrd teńgege deiin), mikronesieleý – 1,7 esege (2,6-dan 4,5 mlrd teńgege deiin) ulǵaidy. Al Arqalyq, Jezqazǵan jáne Jańaózen qalalarydaǵy kólik qarym-qatynasyn jolǵa qoiý máselesin sheshý úshin temir joldar salyndy, – dedi Álisher Ábdiqadyrov.
Keńes tóraiymy, Májilis depýtaty Iýliia Kýchinskaia málimdegendei, búginde elimizdegi 70 mono jáne shaǵyn qalada 2,3 millionǵa jýyq adam turady. Alaida memlekettik qoldaý sharalary olardyń tek bir bóligine ǵana baǵyttalǵan. Keńes tóraǵasy jergilikti atqarýshy organdardyń ózderine basqarýǵa senip tapsyrylǵan qalalardy damytýda belsendiligi men yqylas-yntasynyń tómen ekenin atap ótti.
– Mysaly respýblikalyq biýdjet jobasyn talqylaý kezinde biz óńirlerde partiianyń sailaýaldy ýádelerin iske asyrý jónindegi jol kartalaryna engizilgen nysandardyń daiyn jobalaý-smetalyq qujattamasynyń joqtyǵyn kórdik, – dedi halyq qalaýlysy. Sondai-aq, Keńes tóraiymy sheneýnikterdiń iri aglomeratsiialar esebinen ýrbanizatsiia deńgeiin arttyrý týraly usynysynyń oryndy ekendigine kúmán keltirdi.
– Orta jáne shaǵyn qalalardy damytý, olardyń bazasynda óńirlerde tartylys núktelerin qurý arqyly ýrbanizatsiia tujyrymdamasy qashan ózgerdi? Shaǵyn qalalardan kóship kelgen azamattardyń baspana, jumyspen qamtý máselelerin qalai sheshemiz? Búginde shaǵyn qalalardyń turǵyndary ol jaqtaǵy páterlerin satyp, iri qalada baspana satyp ala almaidy, – dedi Iýliia Kýchinskaia.
Keńes tóraiymy orynbasary, saiasattanýshy Marat Shibutov ta ózekti taqyrypty qozǵady. Ol aqparat salasynda mono jáne shaǵyn qalalardy damytý boiynsha josparlar men esepterdiń joqtyǵyn jáne statistikalyq aqparattyń qoljetimdiligi óte tómen ekenin alǵa tartty.
Jiyn qorytyndysy boiynsha Keńes ázirlegen usynymdar tiisti vedomstvolarǵa jiberildi. Budan basqa, Ulttyq ekonomika ministrligine Keńeske mono jáne shaǵyn qalalardy damytý jónindegi aldyńǵy baǵdarlamalardyń iske asyrylýy týraly tolyq esep berý, al olardyń basshylaryna damý josparlary men túiindi máselelerdiń tizbesin usyný tapsyryldy.
