Áıelin aıaýsyz uryp óltirdi degen aıyp taǵylyp otyrǵan burynǵy sheneýnik Qýandyq Bıshimbaevtyń aınalasynda qyzý daý júrip jatyr. Qoǵamda adamdardyń pikiri ekige bólindi desek te artyq emes. Tipti keıbireýler áleýmettik jelide Bıshimbaevty ashyqtan-ashyq aqtap, Núkenovalardyń áýletine qara kúıe jaǵyp otyr.

Aıtysker aqyn, Májilis depýtaty Rınat Zaıytov ta eks-mınıstr Qýandyq Bıshimbaevqa qatysty júrip jatqan osy aqparattyq naýqanǵa pikir bildirdi, - dep habarlaıdy Dalanews.kz.

Zaıytovtyń sózinshe, Bıshimbaev ta halyqty ońaı aldaýdy biletin Eski Qazaqstannyń, eski júıeniń adamy. 

"Qýandyq Bıshimbaev degen azamat - kezindegi júıede jumys istep, qoǵamdy qalaı aldaýsyratý kerek, qoǵamdyq pikirdi qalaı burý kerek ekenin óte jaqsy meńgergen adam.

Meniń oıym, qazir Núkenova hanymnyń tarapyna jasalyp jatqan shabýyldar, taǵy bir aqparat shyqty, onyń baýyryn ba taǵy bireýdi qyz zorlamaqshy boldy deıdi. Adamnyń aýzy barmaıtyn qylmysqa qatysy bar degen sıaqty áńgimeler shyqty. Onyń barlyǵy sol áýlettiń qoǵamnyń arasyndaǵy pikirdi qalaı burmalaýǵa bolatynyn jaqsy meńgergenin kórsetip tur", - deıdi depýtat.

Rasynda da, keshe áleýmettik jelide marqum Saltanat Núkenovanyń aǵasy Aıtbek Amangeldige qatysty jazbalar paıda boldy.

Daý Elena Semenova esimdi jeli qoldanýshysynyń jazbasynan keıin shyqty.

"...Eń bastysy, nege marqumnyń aǵasy Aıtbek Amangeldi, zorlyq-zombylyq kórgen áıelderdi qorǵaıtyn adal adam ózi týraly bar shyndyqty aıtpaıdy? Nelikten ol ózine qatysty aryz túskeni jaıly shyndyqty aıtpaıdy? 10 jastaǵy qyzdy, ıaǵnı burynǵy mınıstr Bıshimbaevtyń qyzyn zorlaý áreketi týraly raport baryn nege aıtpaıdy?

Ol zorlaý týraly aryz berilgennen keıin tergeýden qalaı qutyldy? Nelikten Aıbek Amangeldiniń jaǵdaıynda sot tóreligi nátıje bermedi, burynǵy ákim bolǵan aǵasynyń yqpaly boldy ma eken? Nelikten tergeý organdary birneshe saraptama júrgizbedi? Al Bıshimbaevtyń burynǵy jubaıy úshin ne ózgerdi, ol aryz jazyp, sodan keıin eshteńe bolǵan joq dep aryzdy nege qaıtaryp aldy? Qaı kezden bastap bizde dálel emes pikir eskerildi? Nelikten qyzdyń anasy qaıtys bolǵan adamdy altyn adam deıdi? Bul, bir sózben aıtqanda, aqsha úshin bárine kóz jumýǵa daıyn ekijúzdilik dep atalady!" - dep jazdy ol.

Keıin Bıshimbaevtyń 14 jyl otasqan birinshi áıeli Nazym Qaharman munyń bárin joqqa shyǵardy.

Aıtysker Rınat Zaıytov mundaı adam ólimi bolǵan jerde qylmyskerdi eshqashan aqtaýǵa bolmaıtynyn aıtady. Degenmen qazir qyzý aqparattyq soǵys júrip jatqanyn eshkim joqqa shyǵarmaıdy.

"Meniń oıym, ondaı qylmystyq isterde, kisi ólimi bolǵan qylmystyq isterde, dáleli bar qylmystyq isterde qandaı da bir aqtalýdyń oryn alýy múmkin emes. Ondaı aqparattyq soǵys bolyp jatyr.

Ókinishke qaraı, jábirlenýshi tarap aqparattyq soǵysta utylyp jatyr dep oılaımyn", - dedi Zaıytov.

Májilis depýtaty eldegi sottyń ádildigine de kúmán keltirdi. 

"Qazaqstanda sońǵy ret ádiletti sotty qashan kórdińiz?! Bizdiń sot júıesi jeke memleket sıaqty jumys isteıdi. Ashqysy kelse ashady, japqysy kelse jabady. Halyqtyń qatysýymen ashyq sot jasaý kerek deıtindeı Bıshimbaev degen opozısıalyq tulǵa ma, halyqtyń sózin sóılegen adam ba, jazyqsyz jábir kórip sottalyp jatqan adam ba?!" - dep ashyndy depýtat.

Zaıytov aıtyp otyrǵan aqparattyq soǵys bastalyp ketkenine biraz ýaqyt boldy.  Buǵan deıin jýrnalıs Syrym Itqulov burynǵy mınıstr Ermuhamet Ertisbaevty Bıshimbaevty qoldaýǵa qatysy bar adamdardyń biri ekenin aıtqan edi. 

"Qýandyqtyń ákesi Ýálıhan Bıshimbaevtyń ulyn qorǵashtap, qoǵamdaǵy pikirge áser etýge tyrysqan vıdeosy esterińizde me? Ol jýrnalıser men blogerlerdiń úsitnen ózin, ulyn, olardyń otbasyn kópshilik aldynda qorlaǵany úshin aryz jazdy.

Al buqaraǵa ún qatý úshin oǵan Nazarbaevtyń bulbuly - Ermuhamet Ertisbaevtan basqa eshkim múmkindik bergen joq.

Ýálıhan Bıshimbaev ta sol sıaqty, ómir boıy "eski qazaqstandyq". Ýnıversıtetti basqaratyn qatardaǵy rektor retinde esepsiz baılyq jınady. Olar qandaı joldarmen "tabylǵany" túsinikti, sonyń arqasynda jubaıy uzaq jyl boıy tabysty bıznesti basqardy.

Kópshilik Qýandyq Bıshimbaevtyń ózi de sybaılas jemqorlyq úshin otyrǵanyn umytyp ketti, biraq týystarynyń yqpaldy baılanystarynyń arqasynda ol merziminen buryn bostandyqqa shyqty", - dedi Itqulov.

Bala quqyqtary jónindegi ýákil Dınara Zákıeva da osy is boıynsha dabyl qaǵyp, Bıshimbaevty aqtaıtyndarǵa tańy bar ekenin jazdy.