ايەلىن اياۋسىز ۇرىپ ءولتىردى دەگەن ايىپ تاعىلىپ وتىرعان بۇرىنعى شەنەۋنىك قۋاندىق بيشىمبايەۆتىڭ اينالاسىندا قىزۋ داۋ ءجۇرىپ جاتىر. قوعامدا ادامداردىڭ پىكىرى ەكىگە ءبولىندى دەسەك تە ارتىق ەمەس. ءتىپتى كەيبىرەۋلەر الەۋمەتتىك جەلىدە بيشىمبايەۆتى اشىقتان-اشىق اقتاپ، نۇكەنوۆالاردىڭ اۋلەتىنە قارا كۇيە جاعىپ وتىر.
ايتىسكەر اقىن، ءماجىلىس دەپۋتاتى رينات زايىتوۆ تا ەكس-مينيستر قۋاندىق بيشىمبايەۆقا قاتىستى ءجۇرىپ جاتقان وسى اقپاراتتىق ناۋقانعا پىكىر ءبىلدىردى، - دەپ حابارلايدى Dalanews.kz.
زايىتوۆتىڭ سوزىنشە، بيشىمبايەۆ تا حالىقتى وڭاي الداۋدى بىلەتىن ەسكى قازاقستاننىڭ، ەسكى جۇيەنىڭ ادامى.
"قۋاندىق بيشىمبايەۆ دەگەن ازامات - كەزىندەگى جۇيەدە جۇمىس ىستەپ، قوعامدى قالاي الداۋسىراتۋ كەرەك، قوعامدىق پىكىردى قالاي بۇرۋ كەرەك ەكەنىن وتە جاقسى مەڭگەرگەن ادام.
مەنىڭ ويىم، ءقازىر نۇكەنوۆا حانىمنىڭ تاراپىنا جاسالىپ جاتقان شابۋىلدار، تاعى ءبىر اقپارات شىقتى، ونىڭ باۋىرىن با تاعى بىرەۋدى قىز زورلاماقشى بولدى دەيدى. ادامنىڭ اۋزى بارمايتىن قىلمىسقا قاتىسى بار دەگەن سياقتى اڭگىمەلەر شىقتى. ونىڭ بارلىعى سول اۋلەتتىڭ قوعامنىڭ اراسىنداعى پىكىردى قالاي بۇرمالاۋعا بولاتىنىن جاقسى مەڭگەرگەنىن كورسەتىپ تۇر"، - دەيدى دەپۋتات.
راسىندا دا، كەشە الەۋمەتتىك جەلىدە مارقۇم سالتانات نۇكەنوۆانىڭ اعاسى ايتبەك امانگەلدىگە قاتىستى جازبالار پايدا بولدى.
داۋ ەلەنا سەمەنوۆا ەسىمدى جەلى قولدانۋشىسىنىڭ جازباسىنان كەيىن شىقتى.
"...ەڭ باستىسى، نەگە مارقۇمنىڭ اعاسى ايتبەك امانگەلدى، زورلىق-زومبىلىق كورگەن ايەلدەردى قورعايتىن ادال ادام ءوزى تۋرالى بار شىندىقتى ايتپايدى؟ نەلىكتەن ول وزىنە قاتىستى ارىز تۇسكەنى جايلى شىندىقتى ايتپايدى؟ 10 جاستاعى قىزدى، ياعني بۇرىنعى مينيستر بيشىمبايەۆتىڭ قىزىن زورلاۋ ارەكەتى تۋرالى راپورت بارىن نەگە ايتپايدى؟
ول زورلاۋ تۋرالى ارىز بەرىلگەننەن كەيىن تەرگەۋدەن قالاي قۇتىلدى؟ نەلىكتەن ايبەك امانگەلدىنىڭ جاعدايىندا سوت تورەلىگى ناتيجە بەرمەدى، بۇرىنعى اكىم بولعان اعاسىنىڭ ىقپالى بولدى ما ەكەن؟ نەلىكتەن تەرگەۋ ورگاندارى بىرنەشە ساراپتاما جۇرگىزبەدى؟ ال بيشىمبايەۆتىڭ بۇرىنعى جۇبايى ءۇشىن نە وزگەردى، ول ارىز جازىپ، سودان كەيىن ەشتەڭە بولعان جوق دەپ ارىزدى نەگە قايتارىپ الدى؟ قاي كەزدەن باستاپ بىزدە دالەل ەمەس پىكىر ەسكەرىلدى؟ نەلىكتەن قىزدىڭ اناسى قايتىس بولعان ادامدى التىن ادام دەيدى؟ بۇل، ءبىر سوزبەن ايتقاندا، اقشا ءۇشىن بارىنە كوز جۇمۋعا دايىن ەكىجۇزدىلىك دەپ اتالادى!" - دەپ جازدى ول.
كەيىن بيشىمبايەۆتىڭ 14 جىل وتاسقان ءبىرىنشى ايەلى نازىم قاحارمان مۇنىڭ ءبارىن جوققا شىعاردى.
ايتىسكەر رينات زايىتوۆ مۇنداي ادام ءولىمى بولعان جەردە قىلمىسكەردى ەشقاشان اقتاۋعا بولمايتىنىن ايتادى. دەگەنمەن ءقازىر قىزۋ اقپاراتتىق سوعىس ءجۇرىپ جاتقانىن ەشكىم جوققا شىعارمايدى.
"مەنىڭ ويىم، ونداي قىلمىستىق ىستەردە، كىسى ءولىمى بولعان قىلمىستىق ىستەردە، دالەلى بار قىلمىستىق ىستەردە قانداي دا ءبىر اقتالۋدىڭ ورىن الۋى مۇمكىن ەمەس. ونداي اقپاراتتىق سوعىس بولىپ جاتىر.
وكىنىشكە قاراي، جابىرلەنۋشى تاراپ اقپاراتتىق سوعىستا ۇتىلىپ جاتىر دەپ ويلايمىن"، - دەدى زايىتوۆ.
ءماجىلىس دەپۋتاتى ەلدەگى سوتتىڭ ادىلدىگىنە دە كۇمان كەلتىردى.
"قازاقستاندا سوڭعى رەت ادىلەتتى سوتتى قاشان كوردىڭىز؟! ءبىزدىڭ سوت جۇيەسى جەكە مەملەكەت سياقتى جۇمىس ىستەيدى. اشقىسى كەلسە اشادى، جاپقىسى كەلسە جابادى. حالىقتىڭ قاتىسۋىمەن اشىق سوت جاساۋ كەرەك دەيتىندەي بيشىمبايەۆ دەگەن وپپوزيسيالىق تۇلعا ما، حالىقتىڭ ءسوزىن سويلەگەن ادام با، جازىقسىز ءجابىر كورىپ سوتتالىپ جاتقان ادام با؟!" - دەپ اشىندى دەپۋتات.
زايىتوۆ ايتىپ وتىرعان اقپاراتتىق سوعىس باستالىپ كەتكەنىنە ءبىراز ۋاقىت بولدى. بۇعان دەيىن جۋرناليست سىرىم يتقۇلوۆ بۇرىنعى مينيستر ەرمۇحامەت ەرتىسبايەۆتى بيشىمبايەۆتى قولداۋعا قاتىسى بار ادامداردىڭ ءبىرى ەكەنىن ايتقان ەدى.
"قۋاندىقتىڭ اكەسى ءۋاليحان بيشىمبايەۆتىڭ ۇلىن قورعاشتاپ، قوعامداعى پىكىرگە اسەر ەتۋگە تىرىسقان ۆيدەوسى ەستەرىڭىزدە مە؟ ول جۋرناليستەر مەن بلوگەرلەردىڭ ۇسىتنەن ءوزىن، ۇلىن، ولاردىڭ وتباسىن كوپشىلىك الدىندا قورلاعانى ءۇشىن ارىز جازدى.
ال بۇقاراعا ءۇن قاتۋ ءۇشىن وعان نازاربايەۆتىڭ بۇلب ۇلى - ەرمۇحامەت ەرتىسبايەۆتان باسقا ەشكىم مۇمكىندىك بەرگەن جوق.
ءۋاليحان بيشىمبايەۆ تا سول سياقتى، ءومىر بويى "ەسكى قازاقستاندىق". ۋنيۆەرسيتەتتى باسقاراتىن قاتارداعى رەكتور رەتىندە ەسەپسىز بايلىق جينادى. ولار قانداي جولدارمەن "تابىلعانى" تۇسىنىكتى، سونىڭ ارقاسىندا جۇبايى ۇزاق جىل بويى تابىستى بيزنەستى باسقاردى.
كوپشىلىك قۋاندىق بيشىمبايەۆتىڭ ءوزى دە سىبايلاس جەمقورلىق ءۇشىن وتىرعانىن ۇمىتىپ كەتتى، ءبىراق تۋىستارىنىڭ ىقپالدى بايلانىستارىنىڭ ارقاسىندا ول مەرزىمىنەن بۇرىن بوستاندىققا شىقتى"، - دەدى يتقۇلوۆ.
بالا قۇقىقتارى جونىندەگى ۋاكىل دينارا زاكييەۆا دا وسى ءىس بويىنشا دابىل قاعىپ، بيشىمبايەۆتى اقتايتىندارعا تاڭى بار ەكەنىن جازدى.
