Premer-ministr Oljas Bektenov úilerdi sý basýyna bailanysty Aqmola oblysynyń ákimdigin synǵa aldy, dep habarlaidy Dalanews.kz.
Úkimet basshysynyń sózinshe, el boiynsha sý tasqyny jaǵdaiy turaqty. Alaida Aqmola oblysynda jaǵdai kúrdelene túsken, 100-den asa turǵyn úi sý astynda qalǵan. Premer-ministrdiń aitýynsha, zalaldyń aldyn alýǵa bolar edi.
"Sý basý sebepteri eldi mekenderdi qorǵaý boiynsha injenerlik jumystardyń tiisinshe júrgizilmeýi boldy. Mysaly Staryi Kolýton aýylynda Kolýton ózenin tazartý, jaǵalaýdy nyǵaitý jáne túbin tereńdetý jumystary tek 3 shaqyrym ýchaskede júrgizildi, bul jobada 11 shaqyrym jumys kózdelgen. Saldarynan ózen arnasynan asýyna bailanysty úiler sý astynda qaldy. Sý deńgeii joǵary emes, biraq ony da boldyrmaýǵa bolar edi", - dedi Bektenov.
Sondai-aq, zardap shekken eldi mekenderdiń qatarynda Makinsk qalasy da bar. Bektenovtiń aitýynsha, jergilikti bilik qalany sý tasqynynan qorǵaý boiynsha qajet sharalardy ýaqtyly qabyldamaǵan.
Premer-ministr óńirde jyl saiyn sý tasqyny kezinde sol baiaǵy eldi mekenderdi sý basatynyn aityp, Aqmola oblysynyń ákimi Marat Ahmetjanovqa eskertý jasady.
"Aqmola oblysynda qabyldanyp jatqan sharalar tiimsiz. Marat Muratuly, josparlaryńyzdy qarap shyǵyńyz jáne biyl barlyq qajet jumysty oryndańyz. Úileri men ýchaskelerin sý basqan adamdarǵa kómektesińizder", - dep qorytyndylady Bektenov.
Buǵan deiin qandai jaǵdai boldy?
Aqmola oblysyndaǵy aýyldarda úilerge sý kirdi. Sebebi Esil ózeni arnasynan asyp ketti. Sonyń saldarynan Aqan Qurmanov aýylyndaǵy tórt úige sý kirip, aýlasy malmandai sý boldy.
Qutqarýshylar turǵyndardyń baspanalaryn qum salynǵan qappen qorshap, kóshelerge qosymsha qorǵan jasady.
Al Astrahan aýdanynda tasqyn saldarynan turǵyndar qara túnekte qaldy.
