Aqmola oblysynda prokýratýra qabyldaǵan sharalardyń nátıjesinde jalpy quny 82 mln teńgeden asatyn aýyl sharýashylyǵy jerleri memleket menshigine qaıtaryldy, dep habarlaıdy Dalanews.kz.

Aqmola oblysynyń prokýratýrasy málimetinshe, Sandyqtaý aýdanynyń prokýratýrasy jer komısıasynyń qyzmetine taldaý júrgizý barysynda zań talaptarynyń buzylǵanyn anyqtaǵan. Atap aıtqanda, ýaqytsha óteýli jer paıdalaný quqyǵyn berý jónindegi konkýrs kezinde ótinimderdi qaraý jáne qorytyndy shyǵarý tártibi saqtalmaǵan.

Tekserý nátıjesinde konkýrs qorytyndysy úsh kezeńmen shyǵarylǵany belgili boldy. Al qoldanystaǵy zańnama boıynsha konkýrs nátıjesi ony ótkizgennen keıingi kelesi kúni jarıalanýy tıis. Belgilengen merzimderdiń saqtalmaýy konkýrstyń ashyqtyǵy men ádildigine áser etken.

Qadaǵalaý aktisiniń negizinde jerdi paıdalaný jáne qorǵaý salasyndaǵy memlekettik baqylaý organy sot tártibimen 7 jer ýchaskesin jalǵa berý týraly kelisimshartty jaramsyz dep tanydy. Sonyń nátıjesinde zańsyz berilgen jalpy aýmaǵy 1400 gektardy quraıtyn aýyl sharýashylyǵy jerleri memleketke qaıtaryldy.

Anyqtalǵan zańbuzýshylyqtar úshin jaýapty laýazymdy tulǵalar ákimshilik jaýapkershilikke tartyldy.

Prokýratýra zańsyz bólingen jerlerdi qaıtarý jáne jer qatynastary salasyndaǵy zańdylyqty qamtamasyz etý jumystary jalǵasatynyn málimdedi.