Aqyly joldardyń baǵasy qymbattamaidy
Komitet ókilderi halyqty saq bolyp, arandatýshylyqqa jol bermeýge shaqyrdy. Qosymsha suraqtar týyndaǵan jaǵdaida 1403 nómiri boiynsha habarlasýǵa bolady. Esterińizge sala keteiik, jalǵan aqparat taratqan tulǵalar qylmystyq jaýapkershilikke tartylady.
Búginde respýblika boiynsha uzyndyǵy 2,2 myń shaqyrym bolatyn I sanattaǵy avtojoldardyń 11 aqyly ýchaskesi jumys isteýde.
Aqyly ýchaskelerdegi tarifter Qazaqstan Respýblikasy Úkimetiniń 2013 jylǵy qaýlysymen bekitilgen. Olar kelesidei:
- jeńil kólik úshin – shaqyrymyna 1 teńge;
- 16 orynǵa deiingi avtobýstar jáne 1-den 2,5 tonnaǵa deiingi júk kólikteri úshin – shaqyrymyna 5 teńge;
- 32 orynǵa deiingi avtobýstar jáne 5,5 tonnaǵa deiingi júk kólikteri úshin – shaqyrymyna 10 teńge;
- 32 orynnan joǵary avtobýstar jáne 10 tonnaǵa deiingi júk kólikteri úshin – shaqyrymyna 15 teńge;
– 10-nan 15 tonnaǵa deiingi júk kólikteri úshin – shaqyrymyna 20 teńge;
- 15-ten 25 tonnaǵa deiingi júk kólikteri úshin – shaqyrymyna 25 teńge.
Qazirgi ýaqytta qoldanystaǵy I sanattaǵy aqyly ýchaskeler boiynsha jol júrý tarifin kóterý kózdelmeidi, iaǵni olar burynǵy qalpynda qalady.
Tek shet elderdiń tranzittik júk kólik quraldary úshin jol júrý tarifin ulǵaitý máselesi qarastyrylýda. Qazirgi ýaqytta bastama halyqaralyq zańnamany eskere otyryp, qarastyrylyp jatyr. Bul sheshim jergilikti kompaniialar arasynda adal básekelestik týdyrady. Osyǵan bailanysty, avtojoldardyń aqyly ýchaskeleri boiynsha júrý úshin birizdendirilgen jáne tranzittik tarifter ázirlenýde.
