Tótenshe jaǵdailar ministri Shyńǵys Árinov "Aqsai" basseinindegi sel ustaityn bógetti salý kezinde aqsha jymqyrylǵanyn aitty, - dep habarlaidy Dalanews.kz.
10 sáýirde Almatylyqtardy selden qorǵaýǵa arnalǵan Aqsai bógetine qatysty bylyqtar áshkere bolǵanyn habarlaǵan edik. ProTenge telegram arnasy osy turǵyda zertteý júrgizgen. 22 milliard teńge bólingen bógettiń sapasy men salyný merzimine qatysty suraqtar týǵan.
Bógetti salýǵa qarjy pandemiia kezinde – 2020 jyly bólingen. Qurylysqa qatysty konkýrs jedeldetilgen túrde ótip ketken. Qurylys 2022 jyly bitýi kerek bolǵan.
Memlekettik sáýlet-qurylys baqylaýy basqarmasy qurylys jumystarynda buzýshylyqtar bolǵanyn anyqtaǵan. Zańbuzýshylyqtar aýyz toltyryp aitarlyqtai bolǵandyqtan "TOLAGAI -2050" JShS merdiger kompaniiasy qurylysty toqtatyp, artynsha kelisimshart joiylǵan. 2023 jyldyń tamyzynda bóget qurylysy toqtap turǵanyna bes aiǵa jýyqtaǵan kezde ony salýǵa tapsyrys bergen «Qazseldenqorǵaý» qurylys kompaniiasymen sottasqan. Telegram arna málimetinshe, 2022 jyldyń basynda Nazarbaeva Aqbota Bolatqyzy kompaniia quryltaishylarynyń biri bolǵan.
Aita keteiik, sóz bolyp otyrǵan bóget Almatydaǵy Naýryzbai aýdanynyń jáne Almaty oblysynyń quramyna kiretin Qarasai aýdanynyń turǵyndaryn selden qorǵaidy dep qarastyrylǵan.
Aqsha jymqyrý týraly derek sel ustaityn bógetti tekserý barysynda anyqtalǵan. Nysan qurylysy boiynsha merdigerdiń mindettemelerin oryndamaýy saldarynan 30 myńǵa jýyq almatylyqtardyń ómirine qaýip tóndi.
"Osyǵan bailanysty "Qazseldenqorǵaý" basshylyǵynyń aldynda tiisti materialdardy protsestik sheshim qabyldaý úshin QR Qarjy monitoringi agenttigine berý týraly másele kóterildi. Onyń nátijeleri boiynsha QR QMA qylmystyq is qozǵady jáne merdiger uiymnyń jaýapty tulǵalaryna qatysty biýdjet qarajatyn urlaý boiynsha tergeý júrgizilip jatyr", - dedi TJM.
