Apatty úide kámeletke tolmaǵan eki balamen birge turǵan Astana turǵyny sot arqyly elorda ákimdiginen turǵyn úi berýge qol jetkizdi, dep habarlaidy Dalanews.kz.
Bul týraly 2024 jylǵy 27 tamyzda QR Joǵarǵy soty málimdedi.
"Anasy men onyń eki kámeletke tolmaǵan balasy Astana ákimdigine, turǵyn úidi jóndeý jobasyn júzege asyrý komissiiasyna turǵyn úi berýden bas tartýdy zańsyz dep taný, olardy jalǵa berý sharty boiynsha baspana berýge májbúrleý týraly talap qoiýmen sotqa júgingen. MAÁS tarapynan talap qoiý qanaǵattandyryldy. Apelliatsiia birinshi satydaǵy sottyń sheshimin ózgerissiz qaldyrǵan",- delingen sot habarlamasynda.
Jaýapkerler Joǵarǵy Sotqa kassatsiialyq shaǵym túsirdi.
"Talap qoiýshy memleket menshigi bolyp tabylatyn daýly páterde týǵan kúninen bastap ata-anasymen birge turady. Ákesi 1977 jyldan, anasy 1987 jyldan beri sol úide tirkelgen. 2023 jyly turǵyn úi qurylysy qaýipti dep tanylyp, májbúrli túrde ielikten shyǵarylǵan. Jergilikti sottar áiel men onyń qyzdarynyń daýly páterdi ashyq paidalanyp otyrǵanyna jáne basqa baspanasy joqtyǵyna zańdy túrde nazar aýdardy. Tiisinshe, "Turǵyn úi qatynastary týraly" Zańnyń 69-babynyń ólshemsharttary boiynsha olar muqtaj dep tanylady".
Jaýapkerlerdiń jańa baspana berýden bas tartýdaǵy dálelderiniń biri — talap qoiýshylarda quqyq belgileitin qujattardyń joqtyǵy.
"Alaida, memlekettik mekeme olarǵa daýly páterde uzaq ýaqyt turýyna qatysty eshqandai talap qoimaǵan. Bul jaǵdaidy menshik iesiniń únsiz kelisimimen jaldaý sharty boiynsha turý dep esepteý kerek. Demek, talap qoiýshylar Zańnyń 105-babynda kórsetilgendei, memlekettik qordan turǵyn úidi jaldaý sharty boiynsha alý sharttaryna jatady".
QR Joǵarǵy soty baspasóz qyzmeti
Joǵarǵy sot atap ótkendei, kassatsiialyq satyda jaýapkerler óz talaptaryn negizdeý úshin nazar aýdarýǵa turarlyq jańa dálelder keltirgen joq.
"Taraptyń istiń obektivti mán-jailaryna sáikes keletin sot qorytyndylarymen kelispeýi daýly sot aktileriniń kúshin joiýǵa negiz bolyp tabylmaidy" delingen Joǵarǵy Sottyń ÁJSA-nyń №6001-24-00-6ap/163 qaýlysynda.
