Jýrnalist ári zańger Lázzat Asanova Túrkistan oblysynyń Ordabasy aýdanyndaǵy "Baton-2" jekemenshik balabaqshasyna 2017–2025 jyldar aralyǵynda biýdjetten shamamen 1,3 mlrd teńge aýdarylǵanyn málimdedi. Ol bul qarajattyń bólinýine qatysty derekter resmi tekserýdi qajet etetinin jetkizdi, dep habarlaidy dalanews.kz.
Jýrnalistiń qolyndaǵy aqparatqa sáikes, atalǵan kezeńde aýdandyq bilim bólimin basqarǵan Shuǵa Turmaǵanbetqyzy men "Baton-2" bóbekjai-balabaqshasynyń basshysy Aisulý Turmaǵanbetqyzy týǵan apaly-sińlili bolýy múmkin.
"Ordabasy aýdanynda zańdy buzyp, qarajatty aýdara berý me? Nege zańdylyq saqtalmaidy? Men osy másele boiynsha ekinshi ret kelip turmyn. Maǵan jetken aqparatqa sáikes, Shuǵa Turmaǵanbetqyzy bólimdi basqaryp otyrǵan kezde “Baton-2” balabaqshasyna 1 milliard 300 million teńge aýdarylǵan. Al Aisulý Turmaǵanbetqyzy – onyń týǵan sińlisi. Bul zańdy ma?", – dep surady Lázzat Asanova aýdandyq bilim bóliminiń ókilinen.
Bilim bóliminiń ókili kásippen ainalysýǵa zań júzinde shekteý qoiylmaitynyn aityp, týystyq qatynastarǵa qatysty málimetterdi mekeme teksermeitinin jetkizdi.
"Árkimniń kásippen ainalysýyna shekteý qoiylmaidy. Onyń qandai týystyq qatynasy bar ekenin biz teksermeimiz", – dedi ol.
Alaida bólim ókili burynǵy basshy men balabaqsha jetekshisiniń týys ekenin bilmegenderin aitty. Sondai-aq Shuǵa Turmaǵanbetqyzy tarapynan yqtimal múddeler qaqtyǵysy jóninde jazbasha habarlama túspegenin rastady.
Lázzat Asanova qarjy aýdarý rásiminde elektrondy tsifrlyq qoltańbanyń qoldanylatynyna nazar aýdaryp, jaýapty tulǵalardyń áreketine quqyqtyq baǵa berilýi kerek ekenin aitty.
"Bul jerde múddeler qaqtyǵysy boldy. Komissiia jumys istegen kúnniń ózinde aqsha ETsQ arqyly aýdarylady. Ol kezde ETsQ Shuǵa Turmaǵanbetqyzynyń atynda bolǵan. Al jekemenshik “Baton-2” balabaqshasynyń basshysy Aisulý Turmaǵanbetqyzy edi. Endi osy másele boiynsha aryz jazasyzdar ma, álde únsiz qalasyzdar ma?", – dedi jýrnalist.
Bilim bóliminiń ókili bul aqparattyń Memlekettik qyzmet isteri agenttiginiń Túrkistan oblysy boiynsha departamentine joldanatynyn málimdedi.
Jýrnalist buǵan deiin de máseleni jariialaǵanyn, alaida jaýap almaǵanyn aitty. Sonymen qatar ol balabaqshaǵa qatysty keibir qabyldaý aktileriniń keshki saǵat 21:00 shamasynda rásimdelgenine nazar aýdardy.
""Baton-2" balabaqshasyna qatysty qabyldaý aktileri saǵat 21:00 shamasynda rásimdelip otyrǵan. Bul ýaqyt jumys ýaqytyna kire me?", – dep surady ol.
Bólim ókili saǵat 21:00-diń jumys ýaqytyna jatpaitynyn rastaǵanymen, qujattardyń nelikten keshki mezgilde rásimdelgenine naqty jaýap bermedi.
Lázzat Asanova biýdjet qarajatyn kim bólgenin, tiisti qujattarǵa kim qol qoiǵanyn jáne qarjynyń jumsalýyn qandai organ teksergenin anyqtaýdy talap etip otyr.
"Eger bári zańdy bolsa, qujattaryn jariialasyn. Zań buzýshylyq bolsa, jaýapty tulǵalar jaýap bersin. 1,3 milliard teńge – bir áýlettiń emes, halyqtyń aqshasy. Osynsha jyl baqylaýshy organdar qaida qarady?", – dep jazdy ol.
