Aqylbek Rysqaliev jaýap alý kezinde buǵan deiin bergen túsiniktemesin joqqa shyǵardy.
– Men tergeýde jaýap bergen kezde eseńgirep, qatty kúizeliste boldym. Sol kezde Antikor qyzmetkerleriniń biri kelip, bul qarjyny oblys ákiminiń orynbasary Baqytgúl Hamenovaǵa arnalǵan dep jaýap berý kerek ekenin aitty. Eger men osylai kórsetsem, meniń qorǵalý quqyǵy bar kýá bolyp qalatynymdy túsindirdi. Bul úshin jaýapkershilikke tartylmaitynymdy eskertti. Antikor qyzmetkeriniń naqty kim ekenin aita almaimyn, olardy tanymaimyn, – dedi Rysqaliev.
Rysqaliev Adamov (para berýshi) ekeýi arasyndaǵy kelisimnen Baqytgúl Hamenovanyń habarsyz ekenin sybailas jemqorlyqqa qarsy qyzmet qyzmetkerlerine aitqanyn jetkizdi.
– Meni Hamenovamen qalai sóilesý qajet ekenine daiyndady. Men Adamov, aqsha týraly aitsam, Hamenova ony túsinbeitinin eskerttim. Eshqandai sezik týdyrmaityndai etip sóilep, ymmen sóilesip jetkizý qajet ekenin aitty. Eń bastysy meniń aqsha alyp kelgenimdi Hamenova túsinsin dedi. Meni qalai daiyndady, men solai jetkizdim, – dedi Rysqaliev.
Ol sondai-aq buǵan deiin nege basqasha jaýap bergenin de túsindirdi.
– Men osyǵan deiin kóp oilandym. Osyǵan deiingi áreketterdi kórip qatty sharshadym. Basynda birinshi bergen jaýabymdy ózgerissiz qaldyramyn dep tyrystym. Meni sol daiyndyqtan ótkizgen Antikor qyzmetkerleri sońyna deiin barsań óziń úshin bári jaqsy bolady dep sendirdi. Olar bárinen bosatylasyń dedi. Biraq kúni búginge deiin olardyń tarapynan meni qorǵaý, qoldaý áreketteri jasalmaǵandyqtan, qalai bolǵanyn aitýǵa sheshim qabyldadym, – dedi ol.
Sodan keiin Atyraý oblysy ákiminiń burynǵy orynbasary Baqytgúl Hamenova Aqylbek Rysqalievke alǵys aitty.
– Ne aitarymdy bilmei turmyn. Paiǵambarymyzdan «musylman qandai bolady?» dep suraǵan eken. «Musylman sarań bola ma?» dese, «iá, sarań bolady» degen. «Musylman qorqaq bola ma?» dep suraǵanda, «iá, qorqaq bolady» dep jaýap bergen. «Musylman ótirik aita ma?» deidi, «joq, ótirik aitpaidy» deidi. Búgin musylmandyq tanytqanyńyzǵa, Antikordan emes, Alladan qoryqqanyńyzǵa rahmet! On ai boiy sol tar qapasqa tyqsańyz da, búgin shyndyǵyńyzdy aitqanyńyzǵa rahmet aitamyn. Erlik jasaǵanyńyzǵa rizashylyǵymdy aitamyn, – dedi Hamenova Rysqalievke.
