اقىلبەك رىسقالييەۆ جاۋاپ الۋ كەزىندە بۇعان دەيىن بەرگەن تۇسىنىكتەمەسىن جوققا شىعاردى.
– مەن تەرگەۋدە جاۋاپ بەرگەن كەزدە ەسەڭگىرەپ، قاتتى كۇيزەلىستە بولدىم. سول كەزدە انتيكور قىزمەتكەرلەرىنىڭ ءبىرى كەلىپ، بۇل قارجىنى وبلىس اكىمىنىڭ ورىنباسارى باقىتگۇل حامەنوۆاعا ارنالعان دەپ جاۋاپ بەرۋ كەرەك ەكەنىن ايتتى. ەگەر مەن وسىلاي كورسەتسەم، مەنىڭ قورعالۋ قۇقىعى بار كۋا بولىپ قالاتىنىمدى ءتۇسىندىردى. بۇل ءۇشىن جاۋاپكەرشىلىككە تارتىلمايتىنىمدى ەسكەرتتى. انتيكور قىزمەتكەرىنىڭ ناقتى كىم ەكەنىن ايتا المايمىن، ولاردى تانىمايمىن، – دەدى رىسقالييەۆ.
رىسقالييەۆ اداموۆ (پارا بەرۋشى) ەكەۋى اراسىنداعى كەلىسىمنەن باقىتگۇل حامەنوۆانىڭ حابارسىز ەكەنىن سىبايلاس جەمقورلىققا قارسى قىزمەت قىزمەتكەرلەرىنە ايتقانىن جەتكىزدى.
– مەنى حامەنوۆامەن قالاي سويلەسۋ قاجەت ەكەنىنە دايىندادى. مەن اداموۆ، اقشا تۋرالى ايتسام، حامەنوۆا ونى تۇسىنبەيتىنىن ەسكەرتتىم. ەشقانداي سەزىك تۋدىرمايتىنداي ەتىپ سويلەپ، ىممەن سويلەسىپ جەتكىزۋ قاجەت ەكەنىن ايتتى. ەڭ باستىسى مەنىڭ اقشا الىپ كەلگەنىمدى حامەنوۆا ءتۇسىنسىن دەدى. مەنى قالاي دايىندادى، مەن سولاي جەتكىزدىم، – دەدى رىسقالييەۆ.
ول سونداي-اق بۇعان دەيىن نەگە باسقاشا جاۋاپ بەرگەنىن دە ءتۇسىندىردى.
– مەن وسىعان دەيىن كوپ ويلاندىم. وسىعان دەيىنگى ارەكەتتەردى كورىپ قاتتى شارشادىم. باسىندا ءبىرىنشى بەرگەن جاۋابىمدى وزگەرىسسىز قالدىرامىن دەپ تىرىستىم. مەنى سول دايىندىقتان وتكىزگەن انتيكور قىزمەتكەرلەرى سوڭىنا دەيىن بارساڭ ءوزىڭ ءۇشىن ءبارى جاقسى بولادى دەپ سەندىردى. ولار بارىنەن بوساتىلاسىڭ دەدى. ءبىراق كۇنى بۇگىنگە دەيىن ولاردىڭ تاراپىنان مەنى قورعاۋ، قولداۋ ارەكەتتەرى جاسالماعاندىقتان، قالاي بولعانىن ايتۋعا شەشىم قابىلدادىم، – دەدى ول.
سودان كەيىن اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆا اقىلبەك رىسقالييەۆكە العىس ايتتى.
– نە ايتارىمدى بىلمەي تۇرمىن. پايعامبارىمىزدان «مۇسىلمان قانداي بولادى؟» دەپ سۇراعان ەكەن. «مۇسىلمان ساراڭ بولا ما؟» دەسە، «ءيا، ساراڭ بولادى» دەگەن. «مۇسىلمان قورقاق بولا ما؟» دەپ سۇراعاندا، «ءيا، قورقاق بولادى» دەپ جاۋاپ بەرگەن. «مۇسىلمان وتىرىك ايتا ما؟» دەيدى، «جوق، وتىرىك ايتپايدى» دەيدى. بۇگىن مۇسىلماندىق تانىتقانىڭىزعا، انتيكوردان ەمەس، اللادان قورىققانىڭىزعا راحمەت! ون اي بويى سول تار قاپاسقا تىقساڭىز دا، بۇگىن شىندىعىڭىزدى ايتقانىڭىزعا راحمەت ايتامىن. ەرلىك جاساعانىڭىزعا ريزاشىلىعىمدى ايتامىن، – دەدى حامەنوۆا رىسقالييەۆكە.
