Aqtaýda ańshylyqqa shyqqan Aslan Qydyrbaev qaiǵyly jaǵdaida kóz jumdy. Marqumnyń ólimine qatysty týystarynyń kókeiinde jaýapsyz qalǵan suraq kóp. Bul týraly jýrnalist Rýslan Ótepbai Instagram paraqshasynda habarlady, dep jazady dalanews.kz.
Jýrnalistiń jazýynsha, Aslan Qydyrbaev ańshylyqqa shyǵyp, keiin úiine oralmaǵan. Qaiǵyly jaǵdaidyń naqty qalai bolǵany ázirge tolyq aitylmai otyr.
Marqumnyń jaqyndary ańshylyq kezinde ne bolǵanyn jáne Aslannyń qandai jaǵdaida qaza tapqanyn anyqtaǵysy keledi. Sondai-aq olar oqiǵaǵa birge barǵan azamattardyń bergen túsiniktemelerine qatysty da birqatar saýal baryn alǵa tartqan.
Rýslan Ótepbai aldaǵy jýrnalistik zertteýinde birneshe máselege nazar aýdarylatynyn málimdedi. Atap aitqanda, ańshylyq kezinde naqty ne bolǵany, qaiǵyly oqiǵanyń qandai jaǵdaida oryn alǵany jáne Aslanmen birge bolǵan azamattardyń oqiǵaǵa qatysty ne aitqany sóz bolmaq.
Jýrnalist sondai-aq atalǵan azamattardyń tergeý barysynda bergen túsiniktemeleri ne sebepti birneshe ret ózgergeni de zertteýde kóteriletinin jetkizdi. Alaida bul jaittarǵa qatysty quqyq qorǵaý organdarynyń resmi qorytyndysy ázirge jariialanǵan joq.
"Ańshylyq kezinde naqty ne boldy? Qaiǵyly oqiǵa qalai jáne qandai jaǵdaida oryn aldy? Olar nege tergeýge bergen túsiniktemesin birneshe ret ózgertti?" – dep jazdy Rýslan Ótepbai.
Jýrnalist Aslan Qydyrbaevtyń ólimine arnalǵan zertteýiniń tolyq nusqasyn YouTube arnasynda 26 tamyz kúni saǵat 15:00-de jariialaitynyn habarlaǵan.
