Almatyda anasynyń kózinshe jeti jasar qyzdy qaǵyp ketken júk kóliginiń júrgizýshisi ustaldy, – dep habarlaidy Dalanews.kz.
Qala prokýratýrasy jol apatyna qatysty qylmystyq is boiynsha Renault júk kóliginiń júrgizýshisine qamaýǵa alý túrindegi bultartpaý sharasyn sanktsiialaý týraly ótinishti qoldaǵan.
"Novaia-Buryndai kósheleriniń qiylysynda júk kóliginiń júrgizýshisi rettelmeitin jaiaý júrginshiler ótkelinde joldy kesip ótip bara jatqan jeti jasar qyzdy qaǵyp ketti, bala sol jerde kóz jumdy.
Almaty qalasynyń mamandandyrylǵan aýdanaaralyq tergeý soty júrgizýshige qatysty eki aiǵa qamaýǵa alý túrindegi bultartpaý sharasyn taǵaiyndady", - dep jazylǵan habarlamada.
Aita keteiik, baptyń sanktsiiasynda 5 jylǵa deiingi merzimge belgili bir laýazymdardy atqarý nemese belgili bir qyzmetpen ainalysý quqyǵynan aiyra otyryp, 5 jylǵa deiingi merzimge bas bostandyǵynan aiyrý jazasy kózdelgen.
Qala prokýratýrasy kólik ielerin saq bolýǵa, joldarda ózara syilastyq tanytyp, jol erejesin saqtaýǵa shaqyrady.
