Oǵan alaiaqtyqpen ainalysty, memleketke úlken kólemde ziian keltirdi degen aiyp taǵylǵan. Qazir jazasyn Pavlodar oblysyndaǵy túrmede ótep jatqan kásipkerdiń anasy men advokaty úkimmen kelispeidi. Sol sebepten de olar Astanaǵa kelip, jýrnalisterden arasha surady.
Kásipkerdiń anasy ári qoǵamdyq qorǵaýshysy Ǵaliia Toqberdieva ulynyń qyzmeti sharýalarǵa tek paida ákelgenin aitady.
«Aqmola oblystyq antikordyń tergeýshisi meniń ulymnyń sońyna sham alyp tústi. Sosyn sharýa qojalyqtaryna qysym kórsetip, jalǵan kýálik etýge kóndirip, sol úshin sottap otyr.
Medet memleketke eshqandai zardap keltirgen joq. Biraq sot 98 million teńgeni qoldy qyldy degen sheshim shyǵardy. Taǵylǵan aiyp boiynsha, ulym ornatqan kún panelderin sharýa qojalyqtar paidalanbai otyr.
Al shyn máninde olai emes. 150 sharýa qojalyǵy ieleriniń barlyǵymen jolyqtym. Qai-qaisy bolsa da qondyrǵylardyń qyzyǵyn kórip otyr», - deidi ol.
Ǵaliia Toqberdievanyń paiymynsha, antikor tarapynan sharýa qojalyqtaryna qysym jasalǵan. Tergeý júrip jatyr, panelderdi paidalanbai qoia turyndar degen soń, keibireýi kúte turǵan. Alaida sot aiaqtalsa da, olar sharýa qojalyqtaryna qaita barmaǵan kórinedi.
«Is bir jaqty júrgizildi. Sharýa qojalyqtarynyń sózi múldem qaralmady. Endi kún panelderin alyp ketetin bolsaq, olar kóterilemiz dep otyr. Sharýalar qysym jasalǵanyn sotta da aitty. Biraq oǵan múlde mán berilmedi. Memleket kún panelderine 2,5 million teńge degen shektik baǵa qoiǵan. Medet ol somadan aspady. Eshqandai saraptama jasamai, sottap jiberdi», - deidi kásipkerdiń anasy.
Medet Ahmetovtiń qazirgi advokaty, zańger Baýyrjan Azanovtyń sózinshe, sharýa qojalyqtary ózderin eshqandai jábirlenýshi retinde tanyp otyrǵan joq. Memleketke de zardap kelmegen. Kásipker artyq baǵa qoimaǵan.
«Medet Ahmetov qylymystyq kodekstiń 190-baby boiynsha sottalǵan. Bul alaiaqtyq. Biraq qorǵaýshy retinde aitarym – onyń áreketinde alaiaqtyq faktisi joq. Birinshi satylyq sotta Antikor men prokýratýra artyq baǵa qoiý degen aiyp taqqan joq. Ol úshin birneshe saraptama jasap, qorytyndy shyǵarylýy tiis. Munyń biri de bolmaǵan. Ekinshiden, jábirlenýshilerdiń tarapynan aryzdar da joq. Aqmola oblysynyń aýyl sharýashylyǵy basqarmasy da sotqa eshqandai shaǵym túsirmedi. Anasy aityp otyrǵan 98 million teńge týraly talap-aryzdy áli kórmedik. Bizdiń qorǵaý tarabynyń suraǵy – osyndai sheshim shyǵarǵanda sot qandai zańǵa súiendi? Óitkeni 190-bapqa sáikes memleket asa aýyr zardap shegý qajet. Bul jerde onyń biri de bolǵan joq», - deidi Baýyrjan Azanov.
Sottalýshynyń jaqyndarynyń sózinen belgili bolǵandai, bul is aýylǵa prokýratýra qyzmetkeri kelgen kezde bastalǵan.
Iaǵni jinalys kezinde sharýa qojalyqtarynyń jetekshileriniń biri, 85 jastaǵy qariia Medet Ahmetovtiń kún panelin ýaqytynda jetkizbegenin aitqan. Biraq aryz jazbaǵan. Osydan keiin tekseris bastalyp, aqyr sońy osylai aiaqtalǵan.
Medet Ahmetovtiń isi qazir qoǵamnyń baqylaýynda. Kásipkerdiń jaqyndary osy ádiletsiz úkimge qatysty arasha suraidy.
