"Dıapazon" basylymynyń jazýynsha, 30 qarashada ótken sot otyrysynda aqtaý úkimi shyǵarylǵan.
Sot-medısınalyq saraptama seksýaldyq qylmystarǵa tán obektıvti málimetterdi anyqtamaǵany málim boldy. Arkadıı Nı jalanyń qurbany bolǵan dep jazady basylym.
Sotta anyqtalǵandaı, qyzdyń anasy tanysy arqyly kásipkerden aqsha bopsalaý maqsatynda habarlasyp, ony aýyr qylmystar jasady dep aıyptaǵan. Onyń ústine áıel óz qyzyn depýtat zorlady, qysym kórsetti dep aıtýǵa májbúrlegen. Sotta qyz ózin zorlaǵanyn aıtqan.
Nátıjesinde depýtat pen oǵan qatysy bar dep aıyptalǵan áıel tolyǵymen aqtaldy.
Anasy qyzyn qylmysqa azǵyryp, jalǵan málimdeme jasaǵany úshin 6 jylǵa bas bostandyǵynan aıyryldy. Sottalǵan áıeldiń kishkentaı balasy bar bolǵandyqtan, jazasyn 5 jyldan keıin oryndaıdy.
İs qalaı bastaldy?
Arkadıı Nı ótken jyldyń jeltoqsan aıynda ustalǵan bolatyn. Aıyptaýshy taraptyń aıtýynsha, ol kámelettik jasqa tolmaǵan qyzben jynystyq qatynasqa túsip, ony zorlap, oǵan qarsy basqa da seksýaldyq áreketter jasaǵan. Depýtat kóp uzamaı "Nur Otan" partıasynan shyǵaryldy.
Arkadıı Nı kim?
"Qazaqstannyń 100 jańa esimi" saıtynda Arkadıı Nıdiń 1961 jyly 25 naýryzda Frýnze, qazirgi Bishkek qalasynda dúnıege kelgen delinedi. 1966 jyldan beri Qazaqstanda turady. Sonymen qatar oblystyq máslıhattyń depýtaty retinde "óz aýdanyndaǵy mektepterdiń materıaldyq bazasyn nyǵaıtýǵa kóp eńbek sińirdi, az qamtylǵan otbasylar men Uly Otan soǵysy ardagerleri arasynan shyqqan óz saılaýshylaryna turaqty materıaldyq kómek kórsetti" delingen.
Arkadıı Nıdiń ıeligine úlken "Rokos" kompanıasy kiredi jáne tenıs federasıasynyń fılıalyn basqarady. Eks-depýtat Aqtóbede Batys 2" shaǵyn aýdanynda tenıs ortalyǵyn salǵan.
