Kúni keshe Ánarý Qaldybekqyzyn zorlady dep shýlaǵan Janqosh Turarovqa qatysty tergeý aiaqtaldy. Alaida Ánarýdyń qorǵaýshysy Lázzat Ahatova da istiń toqtatylǵanyna ań-tań, - dep habarlaidy Dalanews.kz Nege.kz-ke silteme jasap.
Onyń sózinshe, quzyrly organdar jábirlenýshi tarapqa eskertpesten isti jaýyp tastaǵan.
«Isti bizge aitpai, zańsyz qysqartqanyn eki kún buryn ǵana bildik. Endi tergeý organy bizdi sotqa shaǵymdanbasyn dep, qaýlyny bermei otyr. Ol qaýlyǵa shaǵymdanatyn, qaita jańǵyrtýǵa quqyǵymyz bar. Tiisti organdardyń bárine shaǵymdanamyz. Janqosh Turarovtyń «kryshasy» týraly, tergeýdegi óreskel zańsyzdyqtar týraly is qozǵalǵan sátte jazǵan edik. Kúdigimiz rastaldy. Politsiia buǵan deiin de Turarovtyń birneshe isin qysqartqan eken. Olar basynan-aq isti jyly jabýǵa, Ánarýdyń aýzyn jaýyp tastaýǵa barynsha kúsh salǵan bolatyn», – dedi Ahatova.
Advokattyń sózinshe, bul isti qaraý barysynda tórt tergeýshi aýysqan.
"Sońy siyrquiymshaqtanyp ketti. Menen ózge taǵy bir advokat bar edi, ol da basqa iske aýysqan. Keiin Almatydan taǵy bir qorǵaýshy qostyq. Endi men Astanadamyn. Qaita-qaita Almatymen eki ortada ári-beri júrýdiń ózi ońai emes. Shyǵyndy tóleiin degen eshkim joq. Sondyqtan ózim onlain qadaǵalap, jazatynymdy jazyp, keńes berip otyrdym. Buryn tergeýshi bolǵan advokattan ótindik. Sol kisi 21 qazanda saraptamaǵa qol qoiýǵa barǵanda istiń qysqarǵanyn aitpaǵan. Bizdi eshkim habardar etpedi. «Merzimin uzarttyq» dedi, biraq ol týraly qaýlyny bermedi", - deidi Lázzat Ahatova.
Advokat boksshy Janqosh Turarov kúshtep, Ánarýǵa oiyna kelgendi istegenin aitady.
"Is materialdarynda ol derekter bar. Alaida, tergeý organy sol kezde ekeýiniń de qanyn saraptamaǵa jiberip, teksermegen.
Nege saraptama birneshe kúnnen keiin jáne proktolog dárigerdiń qatysýynsyz jasaldy? Iaǵni syrtyn ǵana tekserip, ishin teksermegen. Ol da qylmysty jasyrý. Biz Ánarýdy proktolog mamanǵa aparǵanda tik ishegi jyrtylǵany týraly anyqtama berdi. Biraq bul kezde oqiǵanyń bolǵanyna bir ai ótken edi. Munyń bárin táptishtep aita bermeimiz ǵoi. Bul jerde qyzdyń abyroiy da bar", - deidi advokat.
Eske salaiyq, 21 tamyzda Almatynyń Áýezov aýdany politsiia basqarmasyna 1996 jyly týǵan qyz "ózin zorlaǵanyn" aityp, aryz jazǵan edi. Keiin politsiia qylmystyq is qozǵaǵanyn rastady, al tanymal boksshy Janqosh Turarovtyń ózi taǵylǵan aiypty joqqa shyǵardy.
Aryzdyń túskenine eki ai ótse de, Janqosh Turarov bostandyqta júrdi.
2024 jylǵy 18 qazanda Tengri Sport tilshisi departamentke atyshýly iske qatysty resmi saýal joldady.
"Is júrgizý aiasynda sot-meditsinalyq jáne sot-biologiialyq saraptama júrgizildi, onyń qorytyndysy boiynsha zorlaý faktisi rastamaldy. 20 qazanda Qazaqstan Respýblikasy Qylmystyq is júrgizý kodeksiniń 35-baby 1-bóligi 2-tarmaǵy negizinde sotqa deiingi tergep-tekserýdi toqtatý týraly túpkilikti sheshim shyqty.
Áýezov aýdandyq prokýratýrasy bul sheshimmen kelisti", - dep jaýap berdi politsiia.
Aita keteiik, Janqosh Turarov kásipqoi ringte 2009 jyldan beri óner kórsetip keledi. Ol 28 jekpe-jek ótkizip, onyń 20-syn nokaýtpen jeńgen.
Buǵan deiin BAQ pen áleýmettik jelide tanymal qazaqstandyq boksshy Janqosh Turarov «qyz zorlady» degen aqparat tarap ketti. Keiin máselege Almaty politsiiasy pikir bildirip, Áýezov aýdanynyń Politsiia basqarmasy qylmystyq is qozǵaǵanyn málimdedi.
