Lisanyń syi-siiapatyn Qazaqstandaǵy "Shevron" kompaniiasynyń ókilderi Almatydaǵy №10 mektep-internatynyń balaqailaryna tabystady.
Turmysy tómen januialardyń balalary bilim alatyn oqý ornyna arnaiy barǵan kompaniia ókilderi olarǵa bas kiimnen bólek, oiynshaqtar da syiǵa tartty.
Lisanyń toqyma ónerimen ainalysýyna Qazaqstandaǵy «Shevron» kompaniiasynyń ókilderi sebepker bolypty.
Jumystan tys ýaqytta bas qosyp, toqý isimen ainalysatyn eriktiler uiymyn qurýǵa «Shevron» kompaniiasynyń BAQ-pen bailanys koordinatory Ainur Sydyqova uiytqy bolǵan eken.
– Kompaniia qataryndaǵy kóptegen qyzmetkerlerge toqý isiniń qyr-syryn úiretip, osy ýaqytqa deiin olardyń qolymen tigilgen kóptegen dúnielerdi jańa týǵan sábilerge, balalar úilerine tabystaityn ózindik dástúr qalyptastyrdyq.
Kompaniiadaǵy toqý isimen ainalysatyn eriktiler qozǵalysynyń qatary kún saiyn tolyǵyp kele jatyr.
Sonyń bir dáleli – Amerikada turatyn áriptesimiz Lisa Leong. Bizdiń bastamamyzǵa qýana-qýana qosylǵan ol eki aidyń balalarǵa arnalǵan bas kiimder toqyp, Qazaqstanǵa berip jiberdi,
Sonyń nátijesin kórip otyrsyzdar.
Almatydaǵy №10 mektep-internatynyń balaqailaryna Lisa toqyp bergen bas kiimderdi tabystadyq», – deidi ol.
Al balaqailar sonaý Amerikadan syi berip jibergen Lisa apailaryna alǵysyn aityp, perishte tilekterin jaýdyrdy.
«Toqý isi munymen toqtap qalmaidy. Toqyma tobyma qosylyp jatqan kompaniia qyzmetkerleriniń sany kóbeiip keledi. «Biz ustaýdy bilmeimiz, toqý isin úirengimiz keledi» degen kompaniiadaǵy jas qyzmetkerlerdi talabyn shyńdai túsetin bolamyz», – deidi bul rette Ainur Sydyqova.
Aita ketsek, búgingi tańda turmys jaǵdaiy tómen otbasylardyń balalaryna arnalǵan Almatydaǵy №10 mektep-internatynda 254 oqýshy bilim alýda.
– Balalar bes kúni boiy internatta jatyp oqidy. Bes ýaqyt tamaǵy bar, tósek-orny taza. Tek senbi, jeksenbi kúnderi ata-anasy alyp ketedi.
Munda balalarǵa bilim berýden bólek, tárbie máselesine de kóp kóńil bólemiz.
Balalar munda birinshi synyptan bastap toǵyzynshy synypqa deiin oqidy. Al «Shevron» kompaniiasyna aitar alǵysymyz sheksiz. Balalardyń alǵysyn alǵan saýapty is qoi. Mundai sharalar jalǵasty bolsyn dep tileimin, – dedi bizge №10 mektep-internatynyń áleýmettik pedagogi Orazbike Ryspaeva.
