Atap ótsek, oblys ákimdigi bes jyldan beri jastar arasynda «VIP» ǵylymı jobalarynyń baıqaýyn ótkizip keledi. Baıqaýdyń maqsaty – jastardy ınovasıalyq jobalar daıyndaýǵa tartý, jas ǵalymdardy yntalandyrý, áleýmettik mańyzy zor ozyq jobalarǵa qoldaý kórsetý. Bul baıqaý bıyl da jalǵasyn taýyp, jeńimpaz atanǵan bes jas ǵalymǵa granttar Talǵar aýdanyndaǵy «Lesnaıa skazka» týrısik kesheninde ótken kezdesýde tabystaldy.
Kezdesýge jalpy sany júzge jýyq jas qatysty. Shaqyrylǵandar qatarynda jas ǵalymdar, sport ókilderi, jas depýtattar, kóp balaly jas otbasylar, «Jas otaý» baıqaýynyń jeńimpazdary, jas kásipkerler jáne basqa da belsendi jastar bar.
Jastarmen erkin pikir almasqan oblys ákimi A. Batalov óńirdiń basym baǵyttary men atqarylyp jatqan jumystar týraly aıtyp berdi. Sonymen qatar óz sózinde memlekettik jastar saıasatyn júzege asyrý barysyna toqtalyp, «Jumyspen qamtý jol kartasy – 2020», «Bıznestiń jol kartasy – 2020», «Dıplommen – aýylǵa!», «Bolashaq», «Serpin - 2050», «Jasyl el» jobalary jastar úshin úlken múmkindikterge jol ashyp otyrǵanyn aıtty.
- Memleket basshysy jastar máselesine erekshe nazar aýdarady. Bizdiń aldymyzǵa qoıyp otyrǵan úlken mindetterdiń biri de – osy jastar saıasatyn nátıjeli júzege asyrý. Jas órkenniń oqýyna, jumys isteýine jaǵdaı jasaý, bastamalaryn qoldaý, baǵyt kórsetý – bizdiń paryzymyz. Búgingi kezdesýde ózderińmen erkin áńgimelesip, oı bólissek degen nıettemin. Aralaryńda el esimin erekshe maqtanyshpen aıtatyn myqty jastar kóp. Senderdiń tyń oılaryń, jalyn júrekteriń, jigerli isteriń memleketimiz úshin asa qajet, - dedi A. Batalov.
Budan ári áleýmettik-ekonomıkalyq damý máselelerimen qatar jastardyń mamandyq tańdaý, bala tárbıesi sekildi erkin taqyryptaǵy saýaldaryna jaýap berdi. Jastar tarapynan aýyldyq jerlerde aýla klýbtaryn damytý, oblys ortalyǵynda múzıkl teatryn qurý sıaqty birqatar usynystar aıtylyp, usynystar qoldaý tapty.
Kezdesý sońynda A. Batalov jastarmen birge án salyp, estelik sýretke tústi. Sóziniń qorytyndysynda oblys basshysy árdaıym belsendi jastarǵa qoldaý kórsetip, margınaldy jastardy qoǵamdyq ortaǵa tartýǵa jaǵdaı jasaıtyndyǵyn aıtty. Jáne osyndaı kezdesýdi jyl saıyn dástúrli túrde ótkizý uıǵarylyp, kelesi júzdesý Taldyqorǵan óńirindegi Qora shatqalynda, Burhanbulaq sarqyramasy mańynda uıymdastyrylady dep josparlandy. Kezdesýden keıin jastar komandalary arasynda voleıboldan joldastyq kezdesý ótkizildi.
Jalpy Almaty oblysynda 4 myńnan astam jas bar, ıaǵnı olar halyqtyń úshten bir bóligin qurap otyr. Osydan úsh jyl buryn oblystyq jastar saıasaty basqarmasynyń búdjeti 70 mln. teńge kóleminde bolsa, bıyl bul kórsetkish 550 mln. teńgege jetti. Osy jyly jastardyń áleýmettik mańyzdy jobalarynyń baıqaýyna 31 mln. teńge bólingen. Sondaı-aq Halyqaralyq qaıta jańǵyrtý jáne damý banki men QR Bilim jáne ǵylym mınıstrliginiń jastar korpýsyn damytý birlesken jobasyn júzege asyrý sheńberinde oblys jastarynyń 233 jobasy grant utyp aldy.
