"Búgin asyl azamat, ardaqty baýyr, bilikti telejýrnalist Beisen Quranbek dúnieden ótti. Júregim ezilip, janym aýyryp, kókiregim qars aiyrylyp otyr. Men Beisendi eń aldymen azamattyq bolmysy, adami qasietteri, shynshyl minezi úshin jaqsy kórýshi edim. Ol jaǵynýdy, kemshilikti jasyryp-jabýdy bilmeitin. Eshqashan aqiqattyń jolynan ainyǵan emes. Mańaiyna shýaǵyn shashyp, meiirimin tógip júretin jany jaryq azamat edi.
Men əkim bolyp taǵaiyndalǵannan keiin ekinshi kúni keldi, "Aǵa, men qaityp kelip, sizben birge jumys istegim keledi", - dedi. Sodan beri birneshe jyl qoian-qoltyq jumys istedik.
Almaty oblysynyń «Jetisý» telearnasyna bilikti basshylyq jasap, telearnanyń bedelin kóterýge, mazmundyq sapasyn jaqsartýǵa zor úles qosty. Jýrnalister úii ǵimaratynyń salynýyna tikelei yqpal etip, osy istiń basy-qasynda júrdi. Jas jýrnalisterge tálimger bolyp, jolyn ashty. Aǵaǵa ini, kishige qamqor aǵa bola bildi. «Qazaqstan» telearnasyndaǵy «Aitýǵa ońai» baǵdarlamasy arqyly da qanshama myńdaǵan adamǵa kómektesti.
Men sońǵy kúnge deiin onyń aýrýdy jeńip shyǵatynyna senip edim. Ətteń... Biraq ajalǵa arasha joq eken... Beisen týraly ótken shaqta aitýdyń ózi aýyr...
Arys azamatymyzdyń jatqan jeri jaryq, imany joldas bolsyn! Beisenniń jarqyn beinesi bizdiń jadymyzda máńgi saqtalady", – deidi aimaq basshysy.
